KENLE nwiɔ ɛze ɛhɔ, kɛkala ɔle Kule nɔsolɛ. Gyisɛse nee ye ɛzoanvolɛma 12 ne ɛra ekpumgbunli kpole ɛhye mɔɔ wɔ ɛbolɔnsam ne azo la anu kɛ bɛdi Akpabɛnwo aleɛ ne. Nrenya ne mɔɔ ɛnwu ye kɛ ɔlɛfinde yeahɔ la a le Dwudase Yesekaleɔto. Ɔlɛkɔ yeaha yeahile ɛsɔfo ne mɔ kɛzi bɛ sa bahola aha Gyisɛse la.

Dwudase hɔle bɛ ɛkɛ ne anoma, na ɔbizale bɛ kɛ: ‘Saa meboa bɛ memaa bɛkye Gyisɛse a duzu a bɛkɛva bɛkɛmaa me a?’ Bɛhanle kɛ: ‘Dwɛtɛ fufule abulasa.’ Yemɔti Dwudase ɛlɛkɔ ahɔyia menli ɛhye mɔ amaa yeahola yeali bɛ nyunlu yeahile bɛ Gyisɛse. Asoo zɔhane ɛyɛlɛ ɛnle ɛtane?

Bɛli Akpabɛnwo aleɛ ne bɛwie. Na Gyisɛse akee bɔle aleɛlilɛ titile bie abo. Ɔvale kpanwo ɔmanle ye ɛzoanvolɛma ne na ɔhanle kɛ: ‘Bɛlie bɛli, ɔluakɛ ɛhye kile me nwonane ne mɔɔ bɛbava bɛamaa bɛ la.’ Akee ɔvale dwora ne mɔɔ nwanye wɔ nuhua la ɔmanle bɛ na ɔzele kɛ: ‘Bɛnlo, ɔluakɛ ɛhye kile me mogya ne mɔɔ bɛbahwi bɛagua bɛamaa bɛ la.’ Baebolo ne fɛlɛ ɛhye ‘Awulae nɔsolɛ aleɛ ne’ anzɛɛ ‘Awulae aleɛ ne.’

Yizilayɛma lile Akpabɛnwo ne vale hakyele mekɛ mɔɔ Nyamenle manle anwumabɔvolɛ ‘zenle’ bɛ azua ne mɔ azo wɔ Yigyibiti, na ɔhunle belamunli mralɛ mɔɔ wɔ Yigyibitima azua ne mɔ anu la. Noko kɛkala Gyisɛse kpondɛ kɛ ye ɛdoavolɛma ne kakye ye na eza bɛkakye kɛzi ɔvale ye ngoane ɔdole ɛkɛ ne ɔmanle bɛ la. Ɛhye ati a ɔhanle ɔhilele bɛ kɛ bɛli aleɛ titile ɛhye ɛvolɛ biala la.

Bɛlile Awulae Nɔsolɛ Aleɛ ne bɛwiele la, Gyisɛse hanle hilele ye ɛzoanvolɛma ne kɛ bɛnyia akɛnrasesebɛ na bɛmaa bɛ diedi ne anu ɛmia. Awieleɛ kolaa ne, bɛdole edwɛne bɛmanle Nyamenle na akee bɛvile ɛkɛ ne. Ɛnee akee aleɛ ɛdwo kpalɛ, wɔannea ɛnee nɔɔzo bulu ne nwiɔ bɔbɔ ɛkpa nwolɛ. Maa yɛnlea ɛleka mɔɔ bɛhɔle la.