AWOR ta djaweps anochi, dos dia despues. Hesus i su 12 apòstelnan a reuní den un sala grandi ariba pa kome e sena di Pasku Hudiu. E hòmber ku bo ta mira sali ta Hudas Iskariot. E ta bai pa bisa e saserdotenan kon nan por haña Hesus.

Nèt e dia promé, Hudas a bai serka nan i a puntra nan: ‘Kuantu boso ta paga mi pa yuda boso kohe Hesus?’ Nan a bis’é: ‘Trinta moneda di plata.’ P’esei Hudas ta sali pa kontra ku nan pa e hiba nan kaminda Hesus ta. Esei no ta teribel?

E sena di Pasku Hudiu a kaba. Pero awor Hesus ta kuminsá un otro sena spesial. E ta pasa pan pa su apòstelnan i ta bisa: ‘Kome, pasobra esaki ta nifiká mi kurpa ku mi ta duna pa boso.’ Despues e ta pasa un kopa di biña i ta bisa: ‘Bebe, pasobra esaki ta nifiká mi sanger ku lo ser dramá pa boso.’ Beibel ta yama esei e ‘Sena di Señor’; e ta e asina yamá ‘último sena.’

E israelitanan tabata kome e Pasku Hudiu pa nan rekordá e dia ku e angel di Dios a pasa nan kas forbei na Egipto, pero a mata e yu mayó den tur kas di e egipsionan. Pero awor Hesus ke pa su siguidónan rekordá é i kon é a duna su bida pa nan. P’esei el a manda nan pa selebrá e sena spesial aki tur aña.

Despues di a kome e Sena di Señor, Hesus a bisa su apòstelnan tene hopi kurashi i sea firme den fe. Finalmente nan a kanta kantika pa Dios i a sali bai. Awor ta hopi lat, probablemente despues di meianochi. Laga nos mira unda nan ta bai.

Mateo 26:14-30; Lukas 22:1-39; Juan kapítulo 13 te ku 17; 1 Korintionan 11:20.