KIMIK xopan ri qʼij jueves chaqʼabʼ chik, qʼaxnäq chi kebʼ qʼij. Jesús xuqujeʼ ri 12 apóstoles xkeriq kibʼ rech kkebʼana ri waʼim rech ri Pascua chilaʼ. Ri achi tijan kel bʼik are Judas Iscariote. Xbʼe che ubʼixik chike ri täq ajkojol tabʼal toqʼobʼ su kkebʼan che uchapik ri Jesús.

Jun qʼij nabʼe che wariʼ, Judas ubʼim chi wariʼ chike: ‹¿Su kiya chwe we kixintoʼ che uchapik ri Jesús?› Are xkebʼij wariʼ che: ‹Kqaya 30 raqan saq pwäq chawe›, xechaʼ. Kimik Judas xbeʼ kukʼ rech keʼukʼam bʼi rukʼ Jesús. ¡Sibʼalaj itzel wariʼ! ¿La jewaʼ?

Ri waʼim rech ri Pascua xkʼisik. Tekʼuriʼ Jesús xumaj, o xuchaplej, chi jun chik waʼim nim ubʼantajik. Xuya jun kaxlanwa chike ri täq apóstoles tekʼuriʼ xubʼij wariʼ: ‹Chitijaʼ, rumal che wariʼ are kraj kubʼij ri nubʼaqil che kyaʼ iwumal ix›. Tekʼuriʼ xuya vino chike, xuqujeʼ xubʼij: ‹Chitijaʼ, rumal che wariʼ are kraj kubʼij ri nukikʼel, che xtix iwumal ix›. Wariʼ are ri waʼim rech natbʼal re ri Jesús.

Ri israelitas ojer kkebʼan ri waʼim «Pascua» rech natbʼal re chiʼ ri ángel rech ri Ajawaxel xaq xiw ‹xqʼax› pa täq kachoch e kʼo Egipto, tekʼuriʼ xukamsaj ri nabʼeʼal täq akʼalabʼ kech ri Egipcios. Tekʼuriʼ kimik Jesús kraj che ri täq rajtijoxel kkenaʼtasaj areʼ (kkekʼasoj uwäch) xuqujeʼ che xkam rumal kech. Rumal laʼ kbʼan wajun waʼim ronojel täq junabʼ.

Chiʼ xkekʼis ri waʼim, Jesús xubʼij chike ri täq apóstoles che rajawaxik kkexibʼij ta kibʼ xuqujeʼ kkebʼan ko che ri kikojonik. Kʼisbʼal re xkebʼan jun bʼixonem che ri Ajawaxel tekʼuriʼ xeʼel bʼik. Weneʼ qʼaxnäq chi pa nikʼaj che ri chaqʼabʼ. ¿Jachiʼ xebʼe wi?