QAWASQAYKI dibujopiqa jueves tutañam. Jesusmi 12 apostolninkunawan hamurunku kay wasipa altosninman Pascua cenata mikunankupaq. Punkutaña lloqsiq runaqa Jesusta traicionaq Judasmi. Sacerdotekunaman rispam imaynata Jesusta hapirunankupaq ninqa.

Qayna punchawllam Judasqa sacerdotekunawan tanteanakuspanku nirqa: ‘¿Imatataq qowankichikman Jesusta entregaykuptiy?’ nispa. Paykunañataq nirqaku: ‘Kimsa chunka qollqeta pagasqaykiku’ nispa. Chaymi Judasqa paykunawan huñunakuspa Jesuspa kasqanman pusanqa. ¡Allinchuqaya! ¿aw?

Pascua cena mikuytaqa tukurunkuñam. Hinaspanmi Jesusqa sapaqchasqa cenata ruranqa. Hinaspanmi apostolninkunaman huk tantata qoykuspa nirqa: ‘Mikuychik, kaymi rikchakun cuerpoyman qamkunarayku entregasqa kanqa.’ Chaymantapas vinoyoq vasota hapiykuspanmi nirqa: ‘Tomaychik, kaymi rikchakun yawarniyman hinaspa qamkunaraykum chaqchusqa kanqa.’ Chay cenataqa Bibliam sutichan ‘Santa cena’ nispa.

Israel casta runakunaqa Pascua mikunata mikuspanku yuyarirqaku Jehová Diospa angelnin wasinkuta ‘pasaruspa’ Egipto nacionpi runakunapa piwi churinkunallata wañurachisqanta. Jesusmi ichaqa munan discipulonkunaqa payta yuyarinankuta, chaynataq paykunarayku wañusqanta yuyarinankutapas. Chaymi kay huñunakuytaqa sapa watam rurana Jesuspa wañusqanta yuyarinapaq.

Señorpa Cenanta mikuruspanku Jesusqa apostolninkunata kallpancharqa qarinchakunankupaq hinaspa iñiyninkupipas qaqa hina kanankupaq. Chaymantam takikunawan Diosta alabaspanku yaqapas chawpi tuta pasaytaña lloqsirqaku. Hinaspaqa, ¿maymanmi rinqaku?