E PO Paraparau teia, e rua ra i muri mai. Kua aere mai a Iesu e tana au apotetoro e 12 ki roto i teia pia maatamaata i te taua i runga kia kai i te oroa Pasa. Te tangata taau e kite ra e akaruke atura ko Iuda Ikariota. Te aere ra aia i te akakite ki te au taunga e akapeea ratou me opu ia Iesu.

I te ra i mua ua ake, kua aere a Iuda ki ko ia ratou e kua ui atu e: ‘Eaa ta kotou ka oronga mai naku me tauturu au ia kotou i te opu ia Iesu?’ Kua karanga ratou e: ‘E toru ngauru moni ario.’ No reira a Iuda e aere ra i teianei kia aravei i taua au tangata ra, kia taki atu aia ia ratou ki ko ia Iesu. E kino maata tikai teia, me kare ainei?

Kua oti te oroa Pasa. I teianei ra kua akamata a Iesu i tetai atu kaikai anga puapinga. Kua oronga aia ki tana au apotetoro i tetai potonga varaoa e kua karanga e: ‘E kai i te reira, no te mea ko te aiteanga i teia ko toku kopapa te ka orongaia no kotou.’ I reira kua oronga aia kia ratou i tetai karati uaina e kua karanga e: ‘E inu i te reira, no te mea ko te aiteanga i teia ko toku toto, te ka riringiia ki vao no kotou.’ E kapiki ana te Pipiria i teia e ko te ‘kaikai aiai a te Atu,’ me kore te ‘kaikai a te Atu.’

Kua kai to Iseraela i te Pasa i te akamaara kia ratou i te ‘na runga ake’ anga te angera a te Atua i to ratou au are i Aiphiti, tera ra kua tamate i te au mea anau mua pouroa i roto i te au are o to Aiphiti ra. I teianei ra kua inangaro a Iesu i tana au pipi kia akamaara iaia, e i akapeea aia i te oronga anga i tona ora no ratou. No reira aia i akakite ei kia ratou kia akamaara ua rai i teia kaikai anga puapinga i te au mataiti tataki tai.

Muri ake i te kai anga i te Kaikai Aiai a te Atu, kua akakite a Iesu ki tana au apotetoro kia akamaroiroi e kia matutu i roto i te akarongo. I te openga, kua imene ratou ki te Atua e kua aere atu. Kua roa te po i teianei, penei kua pati te tuaero. Ka akara ana tatou e kua aere ratou kiea.