LAMU barri gedensaanni, Hamusete hashsha Yesuusinna 12 hawaariyaatesi Faasiku ayyaani hurbaate ittara konni halaˈladu fooqete minira daggino. Gobba hige fulanni noohu Asqorootu Yihudaati. Isi fule haˈranni noohu kakkalaano Yesuusa amaddanno gara kulansaraati.

Mittu barri albaanni Yihuda kakkalaanonniwa mare togo yee xaˈmino: ‘Yesuusa amaddinanni gede assummoˈnero ma uyitinannie?’ Insano, ‘Sajjoo birra’ yitu. Xa Yihuda haˈranni noohu konni manninni xaade Yesuusi noowa leellishansaraati. Kuni lowo geeshsha busha coye diˈˈikkino?

Faasiku ayyaani hurbaati kaino. Ikkollana Yesuusi wole baxxino hurbaate hanafi. Hawaariyaatesira tima oye togo yii: ‘Kuni kiˈnera uyinanni maalaˈyaatina itte.’ Hakkiinnino burcuqqote noo woyine uyinsahu gedensaanni, ‘Tini kiˈne daafira duˈnantanno mundeeˈyatina agge’ yiinsa. Qullaawu Maxaafi konne hurbaate, ‘Mootichchu hurbaateeti’ yaanno.

Isiraeelete manni Gibitsete noo waro Maganu sokkaanchi nafaransaanni sainotanna, Gibitsete manni mine noo bayira shiinota qaagate Faasiku ayyaana ayirrissino. Xa kayinni Yesuusi rosaanosi isonna heeshshosi insara sayise uyinota qaaggara hasiˈrino. Konne baxxino hurbaate diru dirunku ayirrissanno gede kulinonsahuno iseraati.

Mootichchu Hurbaate ittu gedensaanni, Yesuusi hawaariyaatesi worbuullenna ammanatenni jawaattinore ikkitanno gede kulinsa. Goofimarchohono Maganoho faarso faarsitu gedensaanni hadhu. Hakkawote yanna lowo geeshsha hashshitino; hashshu taaloote ikke saino. Hakkiinni kaˈe hiikka hadhuro hanni laˈno.