ERAI kwana Naiwongonet kware, akaulo naka aparasia aarei. Apotu Yesu ikeyakia 12 agola naelal nakokuju na egorapa ainyam epucit loka Aleleng. Etunganan ngol loiseseni ijo elosi erai Yuda Isikariot. Elosi ngesi alimokin isasedotin epone loepedoriata kesi aikamun Yesu.

Apaaran natubor, alosit Yuda nejaas kesi kosodi aingit ebe: ‘Kiinakinete eong inyo arai kengarak eong yes aikamun Yesu?’ Kotemasi kesi ebe: ‘Apesan akaisauni nuka epuesa.’ Aso elosi do kwana Yuda airiamun kikiliok lu tetere ingarenikini kes kiton nejai Yesu. Mam ngun eroko?

Adaun ainyam epucit loka Aleleng. Kogeu do kwana Yesu epucit loitegelikina. Koinak ikeyakia emugati kobala ebe: ‘Konyamata, lo nges nakeinakinio kanukus.’ Kosodi aikopakin kes aikopo naka ebino, kobala ebe: ‘Komatata, nu kes aokotoka nuebukoros kanukus.’ Enyarit Ebaibuli lu ‘inyamat luka Ejakait,’ arai ‘inyamat luka atibong.’

Anyamete Isiraelin epucit loka Aleleng kanu aisiitikin kes nuka ‘atuboror’ emalaika loka Edeke kotogoikec ko Misiri, konye koar ikiyaik kotoma otogoi luka Imisirian. Konye kwana ekot Yesu itupitok aiitute nges, ka epone loainakinia ngesi akeijar kanukec. Ngupengun elimokitor ngesi kes ainumunum epucit loitegelikina kangolikaru.

Kedautu ainyam Inyamat luka Ejakait luka Atibong, kolimok Yesu ikeyakia atitingor ka agogongor kotoma aiyuun. Kangetakinet, koyeikisi Edeke ikosiosinei kosodete anyoun. Adepa do kwana esawa, bala edeparit kiding kware. Aanyutu aibo elosete kesi.