Makani 99: Muŋanda Yamujulu
LINO muuli Bwane masiku, kwainda mazuba obilo. Jesu abaapositolo bakwe bali 12 baboola muŋanda eeyi mpati yamujulu kuzyi kulya Pobwe lya Kwiindilila. Ooyu muntu ngobona uuzwa muŋanda ngu Judasi Isikaliyoti. Uya kukwaambila bapaizi mbuli mbobakonzya kumujata Jesu.
Ijilo mabala, Judasi wakaliko kuli mbabo alimwi wakababuzya kuti: ‘Ino ncinzi ncomukonzya kundipa ikuti ndamugwasya kujata Jesu?’ Bakati: ‘Makumi aansiliva aali otatwe.’ Aboobo Judasi lino waunka kwaakubona bantu aaba kutegwa abasololele kuli Jesu. Hena eeco tacili cintu cibi ncaacita?
Bamana kulya Pobwe lya Kwiindilila. Pele lino Jesu watalika cilyo acimbi ciyandika kapati. Wabapa Baapositolo bakwe cinkwa, kumane wati: ‘Amulye, nkaambo eeci ciiminina mubili wangu uuya kupegwa kuli ndinywe.’ Amane wabapa nkapu yawaini wati: ‘Amunywe, nkaambo eeci ciiminina bulowa bwangu mbomuya kutililwa.’ Ibbaibbele eeci liciita kuti ‘Cilyo Camangolezya ca Mwami naa Mulalilo wa Mwami.’
Bana Isilayeli bakalya Pobwe lya Kwiindilila kubayeekezya ciindi mungelo wa Leza ‘naakaindilila’ mumaanda aabo mu Ijipiti, pele wakajaya buyo bana bataanzi mumaanda aabana Ijipiti. Pele lino Jesu uyanda kuti basikwiiya bakwe kabamuyeeya ambwaakaaba buumi bakwe akaambo kambabo. Nkakaambo kaako, wakabaambila kuti kabacita amwaka cakulya eeci ciyandika kapati.
Bamane kulya Cilyo ca Mwami Camangolezya, Jesu waambila baapositolo bakwe kuti beelede kuba basicamba alimwi bayumu mulusyomo. Aciindi aawa baimba lwiimbo kuli Leza, kumane bazwa. Kwasiya kaindi, ambweni lino ciindi cainda-inda akati kamasiku. Atubone nkobaunka.
Matayo 26:14-30; Luka 22:1-39; Johane caandaano 13 kusikila ku 17; 1 Ba-Korinto 11:20.
Mibuzyo
- Kweelana ambokwatondezyegwa acifwanikiso, nkaambo nzi Jesu abaapositolo bakwe bali 12 ncobali muŋanda mpati yamujulu?
- Ngwani muntu uuzwa muŋanda, alimwi ncinzi ncayanda kwaakucita anze?
- Ncilyo nzi ciyandika kapati Jesu ncaatalisya nikwamana kuligwa Pobwe lya Kwiindilila?
- Ncinzi Pobwe lya Kwiindilila ncolyakabayeekezya bana Isilayeli, alimwi ncinzi ncocibayeekezya cilyo ciyandika kapati basikwiiya ba Jesu?
- Ncinzi Jesu ncaabaambila basikwiiya bakwe nikwamana kuligwa Cilyo ca Mwami Camangolezya, alimwi ncinzi ncibacita?
Mibuzyo aimwi
- Bala Matayo 26:14-30.
Mbuti Matayo 26:15 mbwatondezya kuti kwaaba nkwaakacita Judasi kwaaba Jesu wakacita caali?
Nimbazu nzi zyobilo bulowa bwa Jesu bwakatilwa mbobubeleka? (Mt. 26:27, 28; Jelemiya 31:31-33; Ef. 1:7; Heb. 9:19, 20)
- Bala Luka 22:1-39.
Muunzila nzi Saatani mbwaakanjila muli Judasi? (Lk. 22:3; Joh. 13:2; Inc. 1:24, 25)
- Bala Johane 13:1-20.
Kweelana acibalo cili ku Johane 13:2, hena Judasi inga watongookwa kuli ceeco ncaakacita, alimwi nciiyo nzi babelesi ba Leza ncobakonzya kwiiya kuli ceeci? (Matl. 4:7; 2 Kor. 2:11; Gal. 6:1; Jak. 1:13, 14)
Nciiyo nzi ciyandika kapati Jesu ncaakapa? (Joh 13:15; Mt. 23:11; 1 Pita 2:21)
- Bala Johane 17:1-26.
Muunzila nzi Jesu mwaakapailila basikwiiya bakwe kuti babe “bamwi”? (Joh. 17:11, 21-23; Balo. 13:8; 14:19; Kol. 3:14)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Mulalilo wa Mwami
Jesu watalisya ciibalusyo eeco basikumutobela ncobeelede kucita amwaka mu Nisani 14.
