EKʼTA chabʼ kʼakʼu yajni ja Jesús ti ajyi soka snebʼumaniki ja bʼa switsil Olibo. Ja yan jaxa yakʼwalil jueves sok jakele ja bʼa kwarto it niwani bʼa oj yabʼye ja waʼelal bʼa Pascua. Ja israʼelenyo wa skʼintaye ja Pascua bʼa wa xya julskʼujole yajni ja yanjel ja Dyos skolpinkan ja snaje yajni titoʼaye bʼa Egipto sok chʼak smilkan ja bʼajtan alatsik ja bʼa snaje ja swinkil Egipto.

Ja maʼ elum-eli jaʼa Judas Iscariote, wajum yal yabʼ ja olomaliki jastal oj bʼobʼ syam-e ja Jesús. Jun kʼakʼu bʼajtan, ja Judasi staʼa loʼil ja olomaliki sok sjobʼo yile: «¿Jas oj awaʼex ki ta kaʼa bʼa wa kʼabʼex ja Jesús?». Ja olomaliki sjakʼawe: «Oj katikonawi 30 sat plata». Ja yuj ja weʼgo ja wajum stsom sbʼaj soka olomaliki bʼa oj waj sjeʼ yile bʼa wa xtax ja Jesusi. ¡¿Anke jelxa ni tuk-el ja ita?!

Yajni chʼak waʼuke sbʼaja Pascua, Jesús stulu yi sok jun pilan waʼelal bʼa jel chaʼanyabʼalil. Ya ekʼuk yi jun pan ja snebʼumaniki sok yala yabʼ: «Loʼanik, yujni ja it jaʼ wa senyaʼan ja jkwerpo oj kaʼ yuj weʼnlex». Anto, ti cha ya ekʼ jun bʼis yaʼal tsʼusubʼ sok yala: «Ukʼanik, yujni ja it jaʼ wa senyaʼan ja jchikʼel oj jpekʼ yuj weʼnlex». Jesús wa skʼana ja snebʼumaniki ajuluk skʼujole bʼa yeʼna soka sakʼanil oj yaʼ bʼa yeʼnle, ja yuj ja jas sjeʼakan ja Jesusi wa xkʼulaxi jabʼil jabʼil. Ja Biblia wa xya sbʼiʼiluk «ja Cena ja Kajwaltiki».

Yajni chʼak waʼukeʼi, ja Jesús yala yabʼ ja snebʼumanik jumasaʼ mok xiwuke sok aʼajyuke tsats soka skʼuʼajel yiʼojeʼi. Tixa och stsʼebʼojtaye yi tsʼebʼoj ja Dyosi sok elye ja bʼa kwarto. Bʼobʼta ekʼta ja nalan akʼwali. ¿Bʼaxa wajume ja weʼgo?