NAU em i Fonde long nait. Jisas na 12-pela aposel ol i kam sindaun long dispela rum na mekim kaikai bilong Pasova. Dispela man i lusim rum na i go ausait em Judas Iskariot. Em i go bilong tokim ol pris long olsem wanem ol i ken holim Jisas.

Long de paslain, Judas i bin i go long ol pris na em i tok: ‘Yupela bai givim wanem samting long mi sapos mi helpim yupela long holim Jisas?’ Ol i tok: ‘30 mani silva.’ Olsem na Judas i go bilong bungim ol dispela man na bringim ol i kam long Jisas. Em i mekim pasin nogut tru, a?

Kaikai bilong Pasova i pinis. Orait nau Jisas i kirapim wanpela nupela kaikai. Em i givim bret long ol aposel na em i tok: ‘Yupela kaikai, long wanem, em i makim bodi bilong mi, em mi bai givim bilong helpim yupela.’ Na em i givim kap wain long ol na em i tok: ‘Yupela dring, long wanem, em i makim blut bilong mi, em mi bai kapsaitim bilong helpim yupela.’ Baibel i kolim dispela bung olsem ‘Kaikai Bilong Bikpela.’

Ol Israel i save mekim Pasova bilong tingim taim ol i bin i stap long Isip na ensel bilong God i abrusim haus bilong ol na kilim i dai namba wan pikinini long haus bilong ol Isip. Tasol nau Jisas i laik bai ol disaipel i tingim em, na olsem wanem dai bilong em i helpim ol. Olsem na em i tokim ol long mekim dispela kaikai long olgeta yia.

Taim ol i mekim pinis Kaikai Bilong Bikpela, Jisas i tokim ol aposel long ol i mas strongim bel na stap strong long bilip. Ol i mekim ol singsing long God na ol i go. Em biknait pinis. Orait nau yumi ken stori long ol i go we.