HATI Kyakana bwire bw’ekiro, hahingwireho biro bibiri. Yesu n’abakwenda be 12 baizire mu kisiika kinu ekikooto eky’ahaiguru kulya ekiihuro ky’okuhingurwaho. Omusaija ow’orukurora nabarugaho ni Yuda Isikalyota. Nagenda kugambira banyakatagara nkoku basobora kukwata Yesu.

Ekiro Kyakasatu, Yuda akaba agenzere halibo kandi yabakaguza: ‘Murampaki kakuba mbakonyera kukwata Yesu?’ Bamugamba bati: ‘Nitwija kukuha ebicweka by’efeeza makumi asatu.’ Hati bunu Yuda nagenda kutangana abasaija banu nukwo abebembere kubahikya hali Yesu. Kinu tikiri kintu kibi muno?

Ekiihuro ky’Okuhingurwaho kihoire. Baitu hati Yesu atandika ekiihuro ekindi eky’embaganiza. Ahereza bakwenda be omugaati kandi abagamba ati: ‘Mugulye, habwokuba gunu nigumanyisa omubiri gwange ogukugenda kuhebwayo habwanyu.’ Nubwo yagaruka yabahereza empwahwa kandi yagamba: ‘Munywe, habwokuba kinu nikimanyisa esagama yange, erukwija kuseseka habwanyu.’ Baibuli eyeta kinu, ‘Ekiihuro kya Mukama waitu eky’orwebagyo,’ rundi ‘Eky’ekiro kya Mukama waitu.’

Abaisareri balyaga ekiihuro ky’Okuhingurwaho kubaijukya maraika wa Ruhanga obu ‘yahingura’ hamaju gaabu mu Misiri, baitu akaita emizigaijo mu maka g’Abamisiri. Baitu hati Yesu nagonza abegeswa be kumwijukaga n’oku yahaireyo obwomezi bwe habwabo. Niyo nsonga habwaki yabagambira kukuza ekiihuro kinu eky’embaganiza buli mwaka.

Hanyuma y’okulya Ekiihuro kya Mukama waitu eky’Orwebagyo, Yesu agambira abakwenda be kuba bamanzi nab’amaani mukwikiriza. Hakumalirra bazinira Ruhanga ebizina kandi baturuka baruga aho. Hati obwire bugenzere, haihi kuhingura saaha mukaga ez’omwitumbi. Katurole ha baagenzere.