ИЙИ хонук эрте берген, бо хүн четверг, кежээ. Иисус 12 апостолдары-биле кырыккы өрээлге пасхалыг кежээки чемни эрттирер дээш келген. Үнүп бар чыдар кижи,— Иу́да Искарио́т. Бараалгакчыларга Иисусту тудуп алырынга дузалажыр дээш бар чыдары ол.

Мырыңай бир хүн бурунгаар Иу́да оларга келгеш: ‘Иисусту тудуп алыр кылдыр силерге дуза кадар болзумза, чүнү алыр мен?’— деп айтырган.— ‘Үжен мөңгүн чоос’,— деп, олар аазаан. Ам болза Иисустуң кайда турарын айтып бээр дээш, Иу́да оларже чорупканы ол-дур. Дыка кончуг-дур бе?

Пасхалыг кежээки чем төнген. Ынчалза-даа Иисус өске — тускай — кежээки чем эгелей берген. Ол апостолдарга хлебти сунгаш чугаалаан: ‘Мону чиңер, чүге дизе ол дээрге силер дээш бердинип турар мээң мага-бодумну илередип турар’. Оон кызыл арагалыг аякты дамчыткаш, база чугаалаан: ‘Мону ижиңер, чүге дизе ол мээң силер дээш төгер ханымны илередип турар’. Библияда ол кежээки чем «Дээргиниң Кежээзи», азы «Дээргиниң Кежээки чеми» деп адаттынып турар.

Еги́петке, Бурганның төлээзи оларның бажыңнарын ‘оюп эрткен’, а еги́петчилерниң бажыңнарынга дун төлдерин өлүргениниң дугайында боттарынга сагындырыг кылдыр, изра́ильчилер Пасханы чип турган. Ам болза Иисус ооң талалакчылары ону сактып чоруур кылдыр, база олар дээш бодунуң чуртталгазын канчаар бергенин сактып чоруур кылдыр, ол күзеп турар. Ынчангаш бо тускай кежээни чылдың-на демдеглээрин ол дилеп турар.

Дээргиниң Кежээзиниң соонда Иисус апостолдарын дидим болгаш бүзүрелинге күштүг болурун кыйгырган. Сөөлүнде олар Бурганны алдаржыдар ырыларны ырлашкаш, чорупканнар. Ам орай дүн дүшкен, дүн-даа ашкан чадавас. Көрүп көрээлем — олар кайнаар чорупкан эвес.