Esapulo 99: Vohondo Yosapalalo
CA KALA Vokuãla koñolosi, papitile ale oloneke vivali. Yesu lolondonge viaye va kasi loku iñila vohondo vaka lila o Paskoa. Ulume o kasi loku tunda ndeti, Yuda Isikariote. Eye o kasi loku enda oku ka sapuila ovitunda ndomo va pondola oku kuata Yesu.
Eci kua kambele eteke, Yuda wa endele kokuavo yu wa va pulisa hati: ‘Vu nyiha nye oco ndu kuatisi oku pakula Yesu?’ Vo kumbulula hati: ‘Akũi atatu kolopalata.’ Noke Yuda wa enda lalume vaco oku ka lekisa Yesu kokuavo. Ku tava hẽ okuti Yuda wa linga ocina cimue cĩvi?
Noke eci va mãla okulia o Paskoa, Yesu wa sovola ondalelo yimue yilikasi. Eye wa eca ombolo kolondonge viaye noke wa popia hati: ‘Tambuli li, momo ombolo eyi yi lomboloka etimba liange lika eciwa kokuene.’ Noke wa ecavo okopo yovinyu kuenje wa popia hati: ‘Nyuiko, momo eyi osonde yange yu pesiwili.’ Ocipito caco ci tukuiwavo Vembimbiliya hati: ‘Ondalelo ya Ñala.’
Va Isareli va enda okulia o Paskoa ndonjivaluko, eci ungelo wa Suku a ponda olonuñulu viosi via va Egito. Pole ka pitile kolonjo via va Isareli. Puãi cilo Yesu, o yongola okuti olondonge viaye vi ivaluka okuti, eye wa eca omuenyo waye kokuavo. Eli olio esunga lieci Yesu a va tumila oku ivaluka ocipito caco unyamo lunyamo.
Eci va mala okulia Ondalelo ya Ñala, Yesu wa popia lolondonge viaye oco va pame kekolelo. Noke lioku imba ocisungo cesivayo ku Suku, haico va tunda. Ca kala ale uteke pamue vokati kuteke. Tu konomuisi oku va endela.
Mateo 26:14-30; Luka 22:1-39; Yoano kocipama 13 toke 17; 1 Va Korindo 11:20.
Apulilo
- Ndomo ca lekisiwa vociluvialuvia momo lie Yesu kumue lekũi lavali kolondonge va kasilili vohondo yosapalalo?
- Ulume u o kasi ndeti oku tunda helie? Kuenda nye eye aka linga?
- Ondalelo yipi ya velapo Yesu a sovola eci va mãla okulia o Paskoa?
- O Paskoa ya enda loku ivaluisa nye ku va Isareli? Kuenda ondalelo eyi ya velapo yi ivaluisavo nye kolondonge via Yesu?
- Eci Ondalelo ya Ñala ya pua, nye Yesu a sapuila olondonge viaye? Kuenda nye ovo va linga?
Apulilo akuavo
- Tanga Mateo 26:14-30.
Elivulu lia Mateo 26:15 li lekisa ndati okuti Yuda poku pakula Yesu wa ci linga muẽle ocipango?
Osonde ya Yesu ya pesiwa yi kuete esilivilo kolonepa vipi vivali? (Mat. 26:27, 28; Yere. 31:31-33; Va Efe. 1:7; Va Hev. 9:19, 20)
- Tanga Luka 22:1-39.
Satana oku iñila vu Yuda ci lomboloka nye? (Luka 22:3; Yoa. 13:2; Ovil. 1:24, 25)
- Tanga Yoano 13:1-20.
Ndomo ulandu welivulu lia Yoano 13:2 u lekisa, anga hẽ Yuda wa kuata ekandu omo lieci a linga? Kuenda nye afendeli va Suku va lilongisilako? (Efet. 4:7; 2 Va Kor. 2:11; Va Gal. 6:1; Tia. 1:13, 14)
Ongangu yipi Yesu a tu sila? (Yoa. 13:15; Mat. 23:11; 1 Pet. 2:21)
- Tanga Yoano 17:1-26.
Vohutililo ya Yesu nye ca lombolokele kolondonge oku kala “vamuamue”? (Yoa. 17:11, 21-23; Va Rom. 13:8; 14:19; Va Kol. 3:14)
Ove o ka ci Sola
YESU—ONJILA, OCILI HAEYE OMUENYO
Ondalelo ya Ñala
Yesu wa tumbika ocipito conjivaluko oco olondonge viaye vi ci ivaluke unyamo lunyamo keteke 14 ya Nisana.
