DUHA ka adlaw na an naglabay ngan Huwebes na nga gab-i yana. Kinanhi hi Jesus ngan an iya 12 nga apostol hinin daku nga kwarto ha igbaw basi manihapon para ha Paskua. An lalaki nga nakikita mo nga nabaya amo hi Judas Iskariote. Tikadto hiya ha mga saserdote basi sumatan kon paonan-o nira madadakop hi Jesus.

Antes hito nga adlaw, kinadto hi Judas ha ira ngan nagpakiana: ‘Ano an iyo ihahatag ha akon kon buligan ko kamo ha pagdakop kan Jesus?’ Hira nagsiring: ‘Trenta ka bug-os nga salapi.’ Salit tikadto na yana hi Judas ha ira basi updan hira kan Jesus. Maraot gud ito nga iya ginbuhat, diri ba?

Human na an panihapon han Paskua. Kondi hini nga takna gintikangan ni Jesus an usa nga espesyal nga panihapon. Iya iginpasa ha iya mga apostol an usa ka bug-os nga tinapay ngan nagsiring: ‘Kaona niyo ini tungod kay nangangahulogan ini han akon lawas nga akon ihahatag para ha iyo.’ Katapos iya iginpasa ha ira an usa nga kopa han alaksiw ngan nagsiring: ‘Inoma niyo ini tungod kay nangangahulogan ini han akon dugo nga igbububo para ha iyo.’ Ha Biblia, gintatawag ini nga ‘panihapon han Ginoo.’

Nangangaon an mga Israelita han panihapon han Paskua basi magpahinumdom ha ira han ginlabyan la han anghel han Dios an ira mga balay ha Ehipto, kondi ginpamatay an mga suhag han mga Ehiptohanon. Pero yana karuyag ni Jesus nga hinumdoman hiya han iya mga sumurunod, ngan an paagi han paghatag han iya kinabuhi para ha ira. Salit ginsugo niya hira nga isaurog inin espesyal nga panihapon kada tuig.

Han human na hira han Panihapon han Ginoo, ginsidngan ni Jesus an iya mga apostol nga magin maisog ngan marig-on ha pagtoo. Katapos, nagkanta hira ha Dios ngan nagkalakat. Gab-i na hinduro, bangin kaagahon na. Aton kitaon kon diin hira kinadto.