Tantara 99

Irô Tan̈abo Etazy

AROE andra zay lôso, kamisy alin̈y tamy zen̈y. Jesosy ndreky apostolinany 12 nanonga tan̈abo etazy io hihinan̈a Paska. Jodasy Iskariota lelahy niboaka in̈y. Izy hitanao io, hivolan̈a amy mpisôron̈o aby io faomba hanambaoran̈a Jesosy.

Nomoalin’izio, Jodasy fa nandeha nan̈ontany irô. Volan̈iny: ‘Zaho amianarô ino, izikoa mitatahy anarô hanambotro Jesosy zen̈y?’ Volan̈in-drô taminany: ‘Volafotsy telopolo.’ Ke Jodasy iziô hitaondra irô amy tany misy Jesosy an̈y. Ratsy raha nataony zen̈y, sa karakôry?

Fihinanan̈a Paska in̈y koa fa vita, Jesosy nanomboko fihinanan̈a vaovao. Izy nan̈amia môfo apostolinany, baka iô nivolan̈a kara’ty: ‘Dikan’ny môfo ty, ain̈inakahy amian̈a anarô, samia mihinan̈a.’ Izy baka tiô nangala kôpy misy divay. Volan̈iny: ‘Dikan’ny divay ty, lionakahy halatsaka ninarô, samia migiaka.’ ‘Sakafo Harivan’ny Tompo’ ikahian’ny Baiboly izio.

Paska io nampahatsiaro Israelita aby io, anjelin’ny Zan̈ahary ‘nandalo’ ta Ejipta, namono talan̈olon’Ejipsianin̈y jiaby in̈y. Iziô io, tian’i Jesosy mpianatranany mahatsiaro izy, ndreky faomba nan̈amezany ain̈inany irô. Zen̈y nahavy izy nan̈iraka irô hankalaza izio, isaka taon̈o.

Tafaran’ny fihinanan̈a Sakafo Harivan’ny Tompo, Jesosy nivolan̈a tamin’apostolinany, fa irô tsy tôkony havozo, baka iô finoan̈an-drô tôkony hatanjaka. Alohan’irô nandeha, nihira antsendriky, han̈amezan̈a voninahitry Zan̈ahary. Sasak’alin̈y tamy zen̈y. Nandeha aia fo irô baka tiô? Zen̈y zahavatsika iziô.

Matio 26:14-30; Lioka 22:1-39; Jaona toko faha-13 ziska toko faha-17; 1 Korintianina 11:20.