SAMBANO lili Lyamcece, pali papite masiku gaŵili. Yesu ni ŵandumetume ŵakwe 12 ayice akuno ku cipinda cekulungwa camwinani kukulya cakulya ca Pasaka. Mundu jwakum’wona ali mkutyokajo ali Yudasi Isikaliyoti. Jwalakwe akwawula kukwasalila ŵambopesi yampaka atende kuti amkamule Yesu.

Liso lyakwe, Yudasi ŵapite kwa jemanjaji nikwawusya kuti: ‘Ana cambe cici naga ngwakamucisya kumkamula Yesu? Jemanjajo ŵamsalile kuti: ‘Mbiya sya silifa syakwana 30.’ Sambano Yudasi akwawula kukuwonegana ni ŵanduŵa kuti ŵalongolele kwa Yesu. Ana ngaŵa yakogoya yeleyi?

Ali amalisisye kulya Pasaka jula, Yesu akutandisya cakulya capajika cinesoni. Akujigala mkate nikwapa ŵandumetume ŵakwe, kaneko akwasalila kuti: ‘Alye, ligongo mkatewu ukwimila cilu cangu, cacicipelecekwe ligongo lya jemanja.’ Kaneko akwapa finyo nikuŵeceta kuti: ‘Amwe, ligongo finyoju akwimila miyasi jangu, jacijipelecekwe ligongo lya jemanja.’ Cakulya capajikaci Baibulo jikusacikolanga kuŵa ‘cakulya caligulo ca Ambuje kapena ngonelo ja Ambuje.’

Ayisalayeli ŵalyaga Pasaka pakusaka kumbucila ndaŵi jele lilayika lya Mlungu ‘lyajendaga’ m’nyumba syawo ku Eguputo, nikuwulagaga ŵanace ŵandanda kupagwa ŵa m’nyumba sya Aeguputo. Nambo sambano jino Yesu akusaka kuti ŵakumkuya ŵakwe amkumbucileje jwalakwe, soni akumbucileje mwaŵapelecele umi wakwe ligongo lya jemanjajo. Ni ligongo lyakwe akwasalila kuti atendeje yeleyi caka cilicose.

Pamasile kulya Cakulya Cegulo ca Ambuje, Yesu akwasalila ŵandumetume ŵakwe kuti aŵe ŵakulimba mtima, soni ŵakulimbangana m’cikulupi. Kumbesi kwakwe, akumjimbila Mlungu nyimbo kaneko wosope akutyoka. Sambano kwaliji kuli kuswele, mwinemwakwe sikati ja cilo. Kwende tulole kwakwawula.