TSʼOʼOK u máan kaʼapʼéel kʼiin, beooraaʼ u áakʼabil jueves. Jesús yéetel u doce apóstoloʼobeʼ, tsʼoʼok u taal u muchʼubaʼob ichil upʼéel nojoch kúuchil yaan tu kaʼanlil upʼéel naj, utiaʼal u kʼiimbesoʼob u ookʼin jaanlil le Pascuaoʼ. Le ka wilik ku joʼoloʼ Judas Iscariote. Táan u bin u yaʼal tiʼe j-kʼiinoʼob bix jeʼel u chukkoʼob Jesuseʼ.

Tu joʼoljoleʼ Judaseʼ tiaʼalajtiʼob: ¿Baʼax ken a tsʼáaʼexten wa ka in kʼubteʼex Jesús? Letiʼobeʼ tu núukoʼob: Jeʼel k-tsʼáaiktech treinta u taakʼinil plataeʼ. Beooraaʼ Judaseʼ táan u bin u yiluba tu yéeteloʼob yoʼolal u biskoʼob yiknal Jesús. ¡Jach táaj kʼaas baʼax ku beetik Judas! ¿Máasaʼ?

Tsʼoʼok u ookʼin jaanlil le Pascuaoʼ. Beoora túunaʼ Jesuseʼ tu káajsaj uláakʼ upʼéel jach kʼaʼanan ookʼin janal. Tu chʼaʼaj upʼéel waajeʼ ka tu máansaj tiʼ u apóstoloʼob táan yaʼalik: Jaanteʼex, tumen lelaʼ u kʼáat yaʼal in wíinklil ku tsʼaʼabal ta woʼolaleʼex. Bey xan úuchik u beetik yéetel le vinooʼ, tiaʼalaj: Ukʼeʼex, tumen lelaʼ u kʼáat yaʼal in kʼiʼikʼel kun wekbil ta woʼolaleʼex. Jeʼex yaʼalik le Bibliaoʼ u kʼaabaʼ le ookʼin jaanlaʼ, u ookʼin janal Yuumtsil.

Le israelitaʼoboʼ ku kʼiimbeskoʼob kaʼach le Pascua utiaʼal u kʼaʼajskoʼob úuchik u táatsʼmáansaʼal u yotochoʼob tumen u ángel Dios tu kaajil Egipto, baʼaleʼ tu najil le egipcioʼoboʼ le ángeloʼ tu kíimsaj le yáax paal siijloʼ. Beoora túunaʼ Jesuseʼ u kʼáat ka kʼaʼajsaʼak tumen u j-tsaypachoʼob letiʼ kíim tu yoʼolaloʼob. Lelaʼ letiʼe ku kʼaʼajsaʼal teʼ ookʼin janal láalaj jaʼaboʼ.

Ka tsʼoʼok u jaantkoʼob u Ookʼin janal Yuumtsiloʼ, Jesuseʼ tiaʼalaj tiʼ u apóstoloʼob maʼ u chʼaʼakoʼob saajkil yéetel ka muʼukʼaʼanchajak u oksaj óolaloʼob. Tu tsʼookeʼ tu kʼayoʼob kʼaayoʼob tiʼ Dioseʼ ka túun jóokʼoʼob. Beooraaʼ tsʼoʼok wal maas tiʼ chúumuk áakʼabeʼ. ¿Tuʼux ku binoʼob?