PAGKAHALI sa kuwarto sa itaas, si Jesus asin an mga apostol niya nagpasiring sa hardin nin Getsemane, na paborito nindang lugar. Sinabi ni Jesus sainda na magdanay na mata asin mamibi. Tapos, medyo nagrayo siya sainda asin nagsubsob sa daga para mamibi.

Paghaloy-haloy, nagbalik si Jesus sa mga apostol niya. Aram mo kun anong piggigibo ninda? Tururog sinda! Tulong beses sindang sinabihan ni Jesus na magdanay na mata, pero kada pagbalik niya, naaabutan niya sindang turog. ‘Paano nindo nagigibong magturog sa arog kaining panahon?’ an sabi ni Jesus sa ikatulong pagbalik niya. ‘Oras na para itao ako sa sakuyang mga kaiwal.’

Kan mismong oras na idto, sarong dakulang grupo nin kalalakihan an nag-abot. Hilinga! May dara sindang mga espada asin pamukpok. Igwa man sindang darang naglalaad na mga karaba. Tapos, saro sainda an nagdulok ki Jesus asin hinadukan ini, arog kan mahihiling mo. Siya si Judas Iscariote! Aram mo kun ta’no ta hinadukan niya si Jesus?

Hinapot siya ni Jesus: ‘Ano Judas, tatrayduron mo ako paagi sa hadok?’ An hadok na idto sarong senyal. Paagi kaiyan, naaraman kan mga lalaki kun si’say si Jesus. Kaya pinurugulan si Jesus kan mga kaiwal niya. Pero dai matugot si Pedro na basta na sana ninda kuanon si Jesus. Binulnot niya an dara niyang espada asin tinigbas * an lalaking harani saiya. Tuminaplis ini sa payo kan lalaki asin natakras an talinga kaini. Pero kinaputan ni Jesus an talinga kan lalaki asin pinaumayan iyan.

Sinabi ni Jesus ki Pedro: ‘Ibalik mo sa sarungan an espada. Ano, dai mo naiisip na puwede akong maghagad sa sakuyang Ama nin ribo-ribong anghel para iligtas ako?’ Siyempre magigibo niya idto! Pero dai iyan ginibo ni Jesus, ta aram niyang panahon na para kuanon siya kan saiyang mga kaiwal. Kaya nag-iba siya sainda. Hilingon ta kun anong mangyayari ki Jesus.