ILYO bafumine mu muputule wa pa muulu, Yesu na batumwa bakwe baile ku cifulo ico baleita ati Getsemane. Uyu te muku wa kubalilapo ukuya kuli ici cifulo. Ilyo bali kulya, Yesu abebele ati balingile ukulola no kupepa. Lyena alifuminepo, aendako panono ukufuma pa basambi, e lyo akontamina pa nshi no kutendeka ukupepa.

Pa numa, Yesu abwelele ukwali abatumwa bakwe. Bushe walishiba ico asangile balecita? Asangile nabalaala! Alibelele ukulola pa miku itatu yonse iyo alesanga nabalaala. Pa muku wa kulekelesha uo abasangile nabalaala, Yesu abebele ati: ‘Kuti mwalaala shani ino nshita? Inshita naisa iya kuti mpeelwe mu minwe ya balwani bandi.’

Apo pene fye baumfwile icongo ca bantu abengi. Awe kwaishile abaume abakwete impanga ne nkonto! Balikwete ne fya kusanikilako. Ilyo bafikile mupepi, umo afumine pe bumba no kuyatomona Yesu nga fintu ulemona pa cikope. Uwatomwene Yesu ni Yuda Iskariote! Mulandu nshi acitile ifi?

Yesu amwipwishe ati: ‘Yuda, ulentomona no kuntomona pa kumfutuka?’ Ilyo Yuda atomwene Yesu alengele abaume abo ali nabo ukwishiba Yesu uo balefwaya. E ico abalwani baile apali Yesu no kumwikata. Lelo Petro talekelepo fye ilyo balesenda Yesu, afumishe ulupanga akwete no kukoma umwaume uwali mupepi. Ulupanga lwapushile umutwe wa ulya mwaume no kumuputulako ukutwi. Lelo Yesu aikete ku kutwi kwa uyu umwaume no kumuposha.

Yesu aebele Petro ati: ‘Bwesesha ulupanga umo lwikala. Bushe ulemona kwati te kuti nombe Tata ukuti ampeele bamalaika abengi sana aba kungafwa?’ Yesu afwaya nga alilombele! Lelo Yesu tacitile ico pantu alishibe ukutila inshita ya kuti abalwani bakwe bamusende, yalifikile. E ico alekele fye bamusenda. Natumone ifyacitike kuli Yesu ilyo bamusendele.