CUNGDOT khaan in an chuah hnu ah, Jesuh le a lamkaltu hna cu Gethsemane dum lei ah an kal. Cu hlan ahcun hika ah hin voi tampi an ra cang. Jesuh nih annih cu i hlauh peng awk ah le thlacam awk ah a chimh hna. Cu hnu ah tlawmpal hla deuh ah a va kal i, thlacam awk ah vawlei ah a bawk.

Cun a lamkaltu pawl umnak lei kha a ra ṭhan. Zei an tuah lio a si lai tiah dah nan ruah? An i hngilh liopi a si! Voithum tiang Jesuh nih an i hlauh peng awk a si a ti hna, sihmanhsehlaw an sin i a ra kir fate cu an i hngilh ko ti kha a hmuh hna. Hmanung bik a rat lio ahcun Jesuh nih: ‘Hi bantuk caan ah hin zeitindah nan i hngilh khawh e? tiah a ti hna. ‘Ka ral kut chung i pek ka si lai nak caan a phan cang,’ a ti.

Cu caan liote ahcun mibu nganpi thawng cu an theih. Zoh hmanh u! Mi hna cu vainam le thingtan he an ra! Cun meifar zong an rak i van pah. An hung naih deuh tik ah, an lak i mizeimaw pakhat cu a hung chuak i, Jesuh lei ah a ra. Hika i nan hmuh bang hin amah cu a hnamh. Hi mipa cu Judas Iskariot a si! Zeicah Jesuh cu a hnamh hnga?

Jesuh nih: ‘Judas, hnamhnak in maw na ka lei?’ tiah a hal. A si, a hnamh mi cu hmelchunhnak a pek mi hna a si. Judas he a ra ṭi mi hna kha an duh mi Jesuh cu hihi a si ti a hngalhter hna. Cucaah Jesuh a ral hna cu hmailei an hung chuak i Jesuh cu an tlaih. Sihmanhsehlaw Piter nih cun doh ve lo in Jesuh cu daite in a tlaihter duh hna lo. A vainam kha aa zuh i a pawng i a um mipa kha a tuk. Mipa a lu cu a nganh deuh i, a orhlei hnakhaw tu kha pet lak in a tuk. Sihmansehlaw Jesuh nih mipa a hnakhaw cu a tongh i a damter ṭhan.

Jesuh nih Piter cu: ‘Na vianam cu a kawng chung ah sawh ṭhan ko. A ka khamh nak hnga ka Pa sin ah vancungmi thong tampi kha ka hal khawh ko hna ti kha na zum lo maw?’ tiah a ti. A si, a hal khawh ko hna! Sihmanhsehlaw Jesuh nih Pathian sin ah vancungmi run thlah hna awk ah a hal duh lo, zeicahtiah a ral hna nih amah an tlaihnak ding caan a tling cang ti kha a hngalh. Cucaah aa tlaihter hna i aa hruai ter ko hna. Atu cu Jesuh cung ah zeidah a tlung ti kha zoh tuah hmanh u sih.

Matthai 26:36-56; Luka22:39-53; Johan 18:1-12.