APRE ki zot ti’n kit sa lasanm anler dan letaz, Zezi ek son bann zapot ti al dan zarden Zetsemane. Zot ti’n deza vin la plizyer fwa. Aprezan Zezi ti demann zot pour pa dormi, me pour priye. I ti al en pti pe pli lwen, i ti tonm ater, bes son latet e priye.

Plitar, Zezi ti retourn kot son bann zapot ti ete. Ki ou krwar zot ti pe fer? Zot ti pe dormi! Trwa fwa Zezi ti demann zot pour pa dormi, me sak fwa ki i ti retournen i ti trouv zot pe dormi. ‘Konman ki zot kapab dormi dan en letan koumsa?’ Dernyen fwa ki i ti retournen Zezi ti dir: ‘Ler in arive pour mon bann lennmi pran mwan.’

Sa menm moman, zot ti antann en gran lafoul dimoun pe fer tapaz. Gete! Sa bann zonm pe vini avek sab ek baton! Zot pe anmenn bann tors pour kler zot. Kan zot ti ariv pli pre, en dimoun ti sorti dan sa lafoul e i ti vin drwat kot Zezi. I ti anbras Zezi, parey ou kapab vwar la. Sa zonm se Zida Iskaryot! Akoz i ti anbras Zezi?

Zezi ti demann li: ‘Zida, ou pe trai mwan par anbras mwan?’ Wi, sa anbrase ti en siny. I ti fer sa bann zonm ki ti’n vin avek Zida konnen ki sa ti Zezi, sa zonm ki zot ti oule. Alor bann lennmi Zezi ti avans devan e tyonbo li. Me Pyer pa ti pou les zot pran Zezi san ki i lager. I ti pran son sab ki i ti’n anmennen e tap sa zonm ki ti obor li. Sa sab ti mank latet sa zonm e koup son zorey drwat. Me Zezi ti tous zorey sa zonm e geri li.

Zezi ti dir avek Pyer: ‘Met ou sab laba. Eski ou pa krwar ki mon kapab demann mon Papa pour anvoy en milye lanz pour sov mwan?’ Wi, i ti kapab! Me Zezi pa ti demann Bondye pour anvoy okenn lanz, akoz i ti konnen ki letan ti’n arive pour son bann lennmi pran li. Alor i ti les zot anmenn li. Annou vwar ki ti arive avek Zezi.