KE ẸMA ẹkekpọn̄ ubet ufọk enyọn̄, Jesus ye mme apostle esie ẹwọrọ ẹka in̄wan̄ Geth·semʹa·ne. Mmọ ẹsidi mi ediwak ini mbemiso. Jesus idahaemi ọdọhọ mmọ ẹdemede ẹnyụn̄ ẹbọn̄ akam. Ndien enye asan̄a esisịt ọkpọn̄ do onyụn̄ okụbi iso ke isọn̄ ndibọn̄ akam.

Ekem Jesus afiak edi ebiet mme apostle esie ẹdude. Afo ekere ete mmọ ẹnam nso? Mmọ ẹdede! Ikata ke Jesus ọdọhọ mmọ ẹdemede, edi ini ekededi enye afiakde edi enye okụt mmọ ẹdede. Jesus ọdọhọ ke akpatre ini enye afiakde edi ete, ‘Mbufo ẹkeme didie ndide ke utọ ini ntem? Ini ekem oro ẹdiyakde mi ẹnọ mme asua mi.’

Ke ukem ini oro ẹkop uyom akwa otu owo. Sese! Mme owo ẹmi ẹdi ye eduat ye mme okpoyon̄! N̄ko mmọ ẹkama utueneikan̄ man ọnọ mmọ un̄wana. Ke ini mmọ ẹsan̄ade ẹkpere, owo kiet ọwọrọ ke otu owo oro ẹbịne Jesus nnennen. Enye otịm enye inua nte afo ekemede ndikụt mi. Owo oro edi Judas Is·carʹi·ot! Ntak emi enye otịmde Jesus inua?

Jesus obụp: ‘Judas, nte afo atap mi ye editịm inua?’ Ih, ntịm inua oro edi idiọn̄ọ. Enye anam mme owo oro ẹsan̄ade ye Judas ẹfiọk ete Jesus edi emi, owo oro mmọ ẹyomde. Ntre mme asua Jesus ẹwọn̄ọ ẹdimụm enye. Edi Peter idiyakke ẹda Jesus ẹdaha ke min̄wanake. Enye osio ofụt oro enye akadade edi ekpi owo oro adade ekpere enye. Ofụt oro akam ebe ibuot owo oro, edi osịbe utọn̄ nnasia esie efep. Edi Jesus otụk utọn̄ owo oro onyụn̄ ọkọk enye.

Jesus ọdọhọ Peter: ‘Sịn ofụt fo ke efọk. Nte ufiọkke ete mmekeme ndiben̄e Ete mi ediwak tọsịn mme angel ndinyan̄a mi?’ Ih, enye ekeme! Edi Jesus iben̄eke Abasi ọnọ mme angel ndomokiet, koro enye ọdiọn̄ọ ke ekem ini ọnọ mme asua esie ndida enye. Ntre enye ayak mmọ ẹda enye ẹwọrọ. Ẹyak ise se itịbede inọ Jesus idahaemi.