BENI amɛshi ŋwɛitsũ lɛ mli lɛ, Yesu kɛ ebɔfoi lɛ je kpo ni amɛtee Getsemane abɔɔ lɛ mli. Ámɛba biɛ aahu shii abɔ. Agbɛnɛ Yesu kɛɛ amɛ ni amɛshi kpe ni amɛsɔle. Kɛkɛ ni etsi ehe kɛtee sɛɛ fioo, kɛkɛ ni ekɛ ehiɛ bu shikpɔŋ koni esɔle.

Sɛɛ mli lɛ Yesu ku esɛɛ eba he ni ebɔfoi lɛ yɔɔ lɛ. Mɛni osusuɔ akɛ amɛfeɔ? Amɛwɔ! Yesu kɛɛ amɛ shii etɛ sɔŋŋ akɛ amɛshi kpe ni amɛkawɔ, shi be fɛɛ be ni ekuɔ esɛɛ ebaa lɛ, ebanaa akɛ amɛwɔ. Beni Yesu ku esɛɛ eba naagbee nɔ̃ lɛ, ebi amɛ akɛ: ‘Te feɔ tɛŋŋ ni nyɛwɔɔ benɛ nɛɛ? Ŋmɛlɛtswaa lɛ eshɛ ni aaaŋɔ mi awo mihenyɛlɔi lɛ adɛŋ.’

Yɛ nakai be lɛ mli nɔŋŋ lɛ anu mɛi babaoo ahe. Kwɛmɔ! Gbɔmɛi lɛ miiba kɛ klantei kɛ tsei! Ni amɛhiɛ kanei koni ekpɛ eha amɛ ni amɛna nii. Beni amɛtsi amɛbɛŋkɛ lɛ, mɔ ko je kpo kɛjɛ gbɔmɛi babaoo lɛ ateŋ ni eba Yesu ŋɔɔ. Kɛkɛ ni eshɔ enaa, tamɔ bɔ ni onaa yɛ biɛ lɛ. Nuu nɛɛ ji Yuda Iskariot! Mɛni hewɔ eshɔ Yesu naa lɛ?

Yesu bi lɛ akɛ: ‘Yuda, ani ooshɔ minaa ni okɛtsɔɔ misɛɛ gbɛ?’ Hɛɛ, enaashɔmɔ lɛ ji okadi ko. Eha hii ni kɛ Yuda ba lɛ le akɛ lɛ ji Yesu, mɔ ni amɛtaoɔ lɛ. No hewɔ lɛ, Yesu henyɛlɔi lɛ tsi amɛbɛŋkɛ lɛ ni amɛmɔ lɛ. Shi Petro eŋmɛŋ gbɛ ni amɛmɔ Yesu ní ekɛ amɛ enɔɔɔ kɛfãaa ehe. Egbala klante ni ehiɛ kɛba lɛ, kɛkɛ ni ekɛfo mɔ ni bɛŋkɛ lɛ kpaakpa lɛ. Klante lɛ tsi kɛtee afã fioo, no hewɔ lɛ esaaa nuu lɛ yitso he, shi efo eninejurɔ toi. Shi Yesu ta nuu lɛ toi he ni etsa.

Yesu kɛɛ Petro akɛ: ‘Okɛ klante lɛ awo ehe bo lɛ mli. Ani osusuuu akɛ manyɛ mabi mi-Tsɛ ni eha mi bɔfoi akpei abɔ ni amɛbahere miyiwala?’ Hɛɛ, ebaanyɛ efee! Shi Yesu biii Nyɔŋmɔ ni etsu bɔfoi kɛba, ejaakɛ ele akɛ be eshɛ ni ehenyɛlɔi lɛ kɛbaamɔ lɛ. No hewɔ lɛ eha amɛnyiɛ ehiɛ kɛtee. Nyɛhaa wɔkwɛa nɔ ni ba Yesu nɔ agbɛnɛ.