TAQSIṬ TIS 100

Ɛisa di tmazirt n Jitsimani

MI D-​FFƔEN si tɣurfeţ-​nni, Ɛisa d yemceggɛen-​is lḥan armi ţ-​ţamazirt n Jitsimani, amkan iɣer ṛuḥen acḥal d abrid yakan. Dinna, Ɛisa yenna i yemceggɛen-​is ad ɛiwzen yerna ad ẓẓallen. Imiren issebɛed cwiṭ iman-​is fell-​asen, yeɣli ɣef wudem iwakken ad idɛu ɣer Ṛebbi.

Mbeɛd, Ɛisa yuɣal ɣer yemceggɛen-​is. Teẓriḍ amek i ten-​yufa? Yufa-​ten ṭṭṣen! Telt meṛṛat i sen-​yumeṛ ad ɛiwzen, lameɛna mkul mi guɣal ɣur-​sen iţţaf-​iten gnen. M’akken i guɣal tikkelt taneggarut, yenna-​yasen: ‘Amek i gezmer a kkun-​id-​yas nadam di tegniţ am tagi? Lweqt ideg ara ţwasellmeɣ ger ifassen n yeɛdawen-​iw iwweḍ-​ed.’

Mazal-​it iţmeslay mi slan i ṣṣut n waṭas n lɣaci. Twalaḍ irgazen-​agi i d-​yusan s iɛekkzan, s lessyuf akk-​d isufa? Uqbel ad awḍen ɣer Ɛisa d inelmaden-​is, yiwen seg-​sen yezwar zdat-​sen, iṛuḥ issuden Ɛisa, akken i t-​teţwaliḍ di ţţeswiṛa-​ya. Argaz-​agi d Yudas n Qeryut. Acuɣer i gessuden Ɛisa?

Issuden-​it axaṭer asuden-​agi d limaṛa swayes ara teɛqel terbaɛt-​nni i d-​yeddan d Yudas anwa i d Ɛisa. Ɛisa yenna-​yas ihi: ‘A Yudas, s usuden ara yi-​txedɛeḍ?’ Imiren kan iɛdawen n Ɛisa mmɣen fell-​as akken a t-​ṭṭfen. Lameɛna Buṭrus ur ten-​iţţaǧǧa ara a t-​awin mebla ma yennuɣ ɣef ddemma-​s. Ijbed-​ed ssif i d-​yewwi yid-​es, iwet yis yiwen wergaz yellan ɣer tama-​s. Izgel aqerruy-​is, meɛna yewwi-​yas ameẓẓuɣ ayeffus. Acu kan Ɛisa issers afus-​is ɣef umeẓẓuɣ n wergaz-​nni, dɣa yeḥla.

Ɛisa yenna i Buṭrus: ‘Err ssif-​inek ɣer wemkan-​is. Eɛni tɣileḍ ur zmireɣ ara ad ssutreɣ i Baba a yi-​d-​iceggeɛ luluf n lmalayekkat akken ad ḥarbent fell-​i?’ Ih, lukan yebɣi yezmer ad ixdem annect-​a. Lameɛna ur yessuter acemma i Ṛebbi axaṭer yeẓra belli yewweḍ-​ed lawan ideg ilaq a t-​ṭṭfen yeɛdawen-​is. Ihi yeǧǧa-​ten a t-​awin. A nwali tura d acu yeḍran d Ɛisa.

Matta 26:36-56; Luqa 22:39-53; Yuḥenna 18:1-12.