YESU hte kasa ni ntsa gawk kaw na pru wa ma ai hpang Getsemane sun de sa wa ma ai. Ndai shara hta shanhte law law lang du ga ma ai. Yesu gaw akyu hpyi nna maja nga mu, nga nna tsun ai. Dai hpang e Yesu gaw ram ram tsan ai shara de sa wa nna ga de gum nhtawm akyu hpyi ai.

Dai hpang shi a kasa ni nga ai shara de bai nhtang wa ai. Shanhte hpa galaw nga na zawn nawn a ni? Yup pyaw nga ma ai. N-yup ai sha maja nga mu, nga nna Yesu gaw shanhte hpe masum lang wa htet da ai. Raitimung shanhte hpang de Yesu nhtang wa yu ai lang shagu yup nga ma ai hpe chyu sha wa mu ai. ‘Ndai zawn re ai ahkying hta nanhte gara hku nna yup nga lu ma ni? nga nna Yesu hpang jahtum lang nhtang wa ai shaloi, tsun dat ai. Hpyen ni ngai hpe rim la na aten du wa sai.

Dai ahkying e masha wunawng kaba ni a nsen hpe na lu ai. Yu dat mu, masha ni ri nhtu ni lang nna sa wa nga ma ai. Wan shanan mung nan sa wa ma ai. Makau kaw e du sa wa ma ai shaloi, masha wunawng kaw na masha langai mi pru wa nna Yesu kaw hkre rai sa wa ai. Ndai sumla kaw mu ai hte maren Yesu hpe sa apup ai. Dai masha wa gaw Yuda-iskarut re. Yesu hpe hpa majaw sa apup a ni?

Yesu gaw: ‘Yuda e apup ai hte nang ngai hpe ap kau na kun?’ nga nna san ai. Teng ai. Apup ai gaw kumla madun ai re. Yesu kadai re ai hpe Yuda hte lawm sa ai masha ni chye lu na matu re. Yesu a hpyen ni shawng de sit sa wa nna Yesu hpe magra rim la ma ai. Raitimung Petru gaw nhkap gasat ai sha Yesu hpe nkam rim la shangun mayu ai. Shi hpye ai nhtu hpe shaw la nna shi a makau na masha wa hpe kahtam dat ai. Abaw kaw nhkra ai sha hkra maga na ana hpe kahtam di kau ya ai. Raitimung Yesu gaw dai masha wa a ana hpe ahtawk nna shamai ya ai.

Petru hpe tsun ai gaw, nhtu hpe shi a shara hta bai tawn u, lamu kasa ni ahking law law sa wa nna ngai hpe karum na matu nye wa kaw hpyi yang nlu na zawn nawn a ni? nga nna Yesu tsun dat ai. Shi hpyi dat yang nlu ai gaw nnga ai. Raitimung Yesu gaw lamu kasa ni hpe shangun dat ya na matu, nhpyi ai. Hpyen ni shi hpe rim la na matu aten du sai lam hpe Yesu chye ai majaw re. Dai rai nna rim la na ahkang jaw ai. Ya Yesu hta gara hku byin wa na hpe yu yu ga.