AUMA thĩinĩ rumu ĩyo yaarĩ nyũmba ya ngoroba-rĩ, Jesu na atũmwo ake magĩthiĩ mũgũnda wa Gethisemane. Haha nĩ handũ mamenyerete gũkaga mbere ĩo. Rĩu Jesu akĩmera maikare mehũgĩte na makĩhoyaga. Agĩcoka agĩthiathia hanini kabere, agĩturumithia ũthiũ thĩ akĩhoya.

Thutha ũcio agĩcoka harĩa atũmwo ake maarĩ. Ũgwĩciria mareka atĩa? Haiya nĩ makomire! Mahinda matatũ Jesu aameraga maikarage meehũgĩte, no ĩndĩ o acoka agakora makomete. Jesu aacoka ihinda rĩa mũthia aamoririe atĩrĩ, ‘Mwahota gũkoma atĩa ihinda ta rĩrĩ? Ihinda nĩrĩkinyu neanwo moko-inĩ ma thũ ciakwa.’

O thaa ĩo inegene rĩa kĩrĩndĩ kĩnene rĩkĩiguĩka. Rorai! Andũ mokĩte na hiũ na ndotono! Makuĩte imũrĩ cia kũmamũrĩkĩra. Maakuhĩhĩria-rĩ, mũndũ ũmwe agĩcomoka gatagatĩ-inĩ ga kĩrĩndĩ na agĩthiĩ erekeire he Jesu. Ta ũrĩa ũrona haha, agĩkĩmũmumunya. Mũndũ ũcio nĩ Judasi Mũisikariota! Aramumunya Jesu nĩkĩ?

Jesu akĩmũria atĩrĩ: ‘Judasi ũkũmumunya nĩguo ũngunyanĩre?’ Ĩĩni, kũmũmumunya nĩkuo kwarĩ rũri. Nĩ gwatũmire andũ arĩa maarĩ hamwe na Judasi mamenye Jesu aarĩ ũ, na nĩwe mũndũ ũrĩa maacaragia. Kwoguo thũ cia Jesu ikĩmũguthũkĩra imũnyite. No ningĩ Petero ndetĩkĩririe manyite Jesu hatarĩ njũkĩrĩria. Aacomorire rũhiũ rwake agĩtema mũndũ ũrĩa waarĩ hakuhĩ nake. Rũhiũ rũu rũkĩhĩtia gũtinia kĩongo kĩa mũndũ ũcio no ĩndĩ rũgĩtinia gũtũ gwake kwa ũrĩo. No ĩndĩ Jesu akĩhutia gũtũ kwa mũndũ ũcio akĩmũhonia.

Jesu agĩkĩĩra Petero atĩrĩ: ‘Cokia rũhiũ njora-inĩ. Kana ũgwĩciria atĩ ndingĩhota kũhoya Awa aandehere makiri ma araika maahonokie?’ Ĩĩni, no ahote! No Jesu ndaigana kũria Ngai amũtũmĩre mũraika o na ũmwe, tondũ nĩamenyaga atĩ ihinda nĩ rĩkinyu thũ ciake imũnyite. Kwoguo akĩmetĩkĩria mamũnyite. Rĩu rekei tuone ũrĩa gwatuĩkire he Jesu.