BYO bafumine mu nzubo ya peulu, Yesu ne batumwa banji bayile ku bujimi bwa Ngesemani. Baiyanga kuno pa bimye byavula. Yesu pano wibambijile kutwajijila na kulaba ne kulomba. Ponkapo, wayile kwa bunke bwanji ne kukunyika kilungi panshi na kulomba.

Pa kupitapo kimye, Yesu waishile jibiji kwajinga batumwa banji. Nanchi walanguluka’mba baubilenga ka? Balaajile! Yesu wibambijile jisatu amba balabenga, bino kimye kyonse kyo aishilenga, wibatainenga saka balaala. Kimye kyapeleleko kyo aishile, Yesu wibambijile’mba: ‘Mwakonsha kulaala byepi pa kimye kyashupa kya uno mutundu? Kimye kyafika kala kya kumpana amiwa ku balwanyi bami.’

Pa kyonkakya kimye kyo aambilenga, baumvwine kiwowo kya jibumba jikatampe. Banabalume baishilenga na mapoko ne mafimbo! Kabiji basendele ne bimunyi bya kusamisha mu jishinda. Byo bafikile pepi, muntu umo wafumine mu jibumba ne kuya kwajinga Yesu. Wamufyompele byonka byo wamona papo. Uno muntu wajinga Yudasa Isakaliota! Mambo ka o amufyompejile Yesu?

Yesu waipwizhe’mba: ‘Yudasa, wamfyompa kuba’mba unsolole nyi?’ Ee, kumufyompa ko kajinga kayukilo. Kalengejile banabalume bajinga ne Yudasa kuyuka’mba awa ye afyompele ye Yesu ye bakebelenga. Onkao mambo, balwanyi ba kwa Yesu baishile ne kumukwata. Bino Petelo kechi wakebelenga’mba Yesu bamusende byonkabyatu ne. Wasomwene mpoko yanji ne kukampa mwanamulume umo ye ajinga nanji pa bwipi. Mu kifulo kya kumufikila ku mutwe, ino mpoko yafikijile ku kutwi kwa kilujo ne kwikukopolako. Bino Yesu wamukwachile mwanamulume ku kutwi kwanji ne kwikubwezhako.

Yesu waambijile Petelo amba: ‘Someka mpoko yobe mo waji kwiifumya. Nanchi kechi wayuka’mba nakonshatu kusashijila Batata ne kuntumina bamalaika bavula ba kumpulusha nenyi?’ Ee, wakonsheshe kuba kino! Pano bino Yesu kechi wamusashijile Lesa kutuma bamalaika ne, mambo wayukile’mba kimye kyafikile kya kumutwala ku balwanyi banji. Onkao mambo, wibalekele’mba bamusende. Leka pano tumone kyamumwekejile Yesu.