Icisimicisyo 100: BaYesu mwi Bala
PANUMA yakufumamo mu cipinda ca peulu, baYesu ne ntangisi syabo baya kwi bala lya Gesemane. Ne kale baalukwisapo apa imiku iingi. BaYesu pano basibula intangisi ati sitwalilile ukulukulaba ne kutembela. Eli baya akatalamukila filya, kabili bainamisya pansi ne kutembela.
Panuma yafyefyo baYesu babwelela ukuli intangisi syabo. Mba walanguluka ati silukucite’ndo? Sililele mutulo! Imiku itatu baYesu basibula ati silyelelwe ukutwalilila ukulukulaba, pano yonse impindi babwela basisangana sililele mutulo. Ili baYesu babwela umuku wakupelako basibula ati: ‘Mba mungalukulala syani pa mpindi iili koti niino? Impindi yafika iyakweba’ti nebo ningapelwa ku bapate banji.’
Pa mpindi yenke’yo lukoso icongo ce bumba ilikulu caumfwika. Lolesya! Abalalume balukwisa ne mpoko ne nkoli! Kabili balipintile ne mimosyo pa kutufya ukubalukuya. Ili bapalamina, umo umuntu afumamo mwi bumba ne kusinkamana baYesu. Abafyontapo, koti nifyefyo wabona apa. Umwalalume ni Juda Isikaliote! Mba nindo abafyontelapo baYesu?
BaYesu bamwipusya ati: ‘Juda, ulukundobela nebo ku cimfyonto?’ Inya, icimfyonto e kesibilo. Cilukwisibisya abalalume Juda ali nabo ati aba e baYesu, umwalalume balukufwaya. Popele abapate ba baYesu babasinkamana mu kubekata. Pano Petilo tekuti abaleke lukoso ukupinta baYesu ukwakubulo’kulwa. Asomona impoko iyi apintile ne kupama umwalalume uwo apalamine nakwe. Impoko yapusa lukoso umutwi wa mwalalume ne kumukwempulako ukutwi ukwa kulwine. Pano baYesu bakwikato’kutwi kwa mwalalume ne kukuposya.
BaYesu babula Petilo ati: ‘Someka impoko yobe umu ikala. Kani webo taulukulanguluka’ti nebo ningabalomba baTata amasausande ankalamba ukwisa mu kumpulusya?’ Inya, bangacita fyopele’fyo! Pano baYesu tababalombele baLesa ukutuma inkalamba isili syonse, nipakuti balisi ati impindi yafika iyakweba’ti abapate babo babapinte. Popele babaleka’ti babapinte. Leka tubone ifyacitika kuli baYesu pano.
Matayo 26:36-56; Luku 22:39-53; Yoane 18:1-12.
Ifyakwipusya
- Nipi baYesu ne ntangisi syabo baya panuma ya kufumamo mu cipinda ca peulu, kabili findo basibula ati silukucita?
- Mba findo baYesu basangana ili babwela uko kuli intangisi, kabili ici cacitika imiku inga?
- Mba nibani abaingila mwi bala, kabili findo Juda Isikaliote acita, koti nifyefyo ifyalangwa mu cikope?
- Mba nindo Juda abafyontelapo baYesu, kabili findo Petilo acita?
- Mba nifindo baYesu balabila kuli Petilo, pano mba nindo baYesu tababalombele baLesa ukutuma inkalamba isili syonse?
Ifyakwipusya na fimbi
- Pendeni Matayo 26:36-56.
Kani ilye’nsila baYesu bafundilemo abasambile babo nindo ingabela cakubwenako iciweme kuli baeluda aba buKlistu muli bulelo? (Mat. 20:25-28; 26:40, 41; Gal. 5:17; Efes. 4:29, 31, 32)
Kani baYesu balukukubona syani ukupyungisye’fyakulifunako ku kulwa ne bantu? (Mat. 26:52; Luku 6:27, 28; Yoa. 18:36)
- Pendeni Luku 22:39-53.
Ili inkalamba yabwenekele kuli baYesu mwi bala lya Gesemane mu kubakosya, kani calukulangililo’kweba’ti baYesu balukulelesika mu cicetekelo cabo? Londolola. (Luku 22:41-43; Yisa. 49:8; Mat. 4:10, 11; Ebeya. 5:7)
- Pendeni Yoane 18:1-12.
Kani baYesu balilamine syani abasambile ku bapate babo, kabili findo tungasambililako kuli cici icakubwenako? (Yoa. 10:11, 12; 18:1, 6-9; Ebeya. 13:6; Jako. 2:25)
