TÁNDI̱ʼI ke̱ena ini cuarto káʼnu kán, ta̱ Jesús xíʼin na̱ apóstolra ku̱a̱ʼa̱nna nu̱ú naní Getsemaní. Xa̱ku̱a̱ʼáva yichi̱ xi̱xa̱ʼa̱nna yóʼo tá ya̱chi̱. Ta vitin káʼa̱n ta̱ Jesús xíʼinna ná kǒo ku̱su̱nna ta ná ka̱ʼa̱nna xíʼin Ndióxi̱, tasaá ni̱kuxíka loʼora nu̱úna, ta xi̱kuxítíra ta ki̱xaʼára káʼa̱nra xíʼin Ndióxi̱.

Tándi̱ʼi nda̱ndikóra nu̱ú ndóo na̱ apóstólra. ¿Á xíni̱ún ndáaña kéʼéna? Na̱ kísi̱va kúúna. U̱ni̱ yichi̱ ndi̱kóra nu̱úna ta u̱ni̱ saá yichi̱ ni̱ka̱ʼa̱nra xíʼinna ña̱ ná kǒo ku̱su̱nna. Ta u̱ni̱ saá yichi̱ nda̱niʼírana kísi̱vana. ʼ¿Ndachun kísi̱ndó á kǒo kivi kundito loʼondó? Xa̱ki̱xa̱a̱ tiempo ña̱ ndataxina yi̱ʼi̱ ndaʼa̱ na̱ sáa̱-ini xíni yi̱ʼi̱ʼ, káchira xíʼinna tá ndi̱kóra yichi̱ u̱ni̱.

Ndi̱ku̱n saá iin síso̱ ki̱xa̱a̱ ku̱a̱ʼání na̱ yiví. Ki̱xa̱a̱na ta níʼina yuchu̱ xíʼin yitu̱n. Iin túu̱n ndoko ñuʼu̱ ndaʼa̱na ki̱xa̱a̱na. Tá na̱kuyatinna, xíʼin na̱ ku̱a̱ʼá yóʼo ki̱ta iinra ta ki̱xa̱a̱ra nu̱ú ta̱ Jesús. Ta chi̱tura nu̱úra, táki̱ʼva xítoún nu̱ú na̱ʼná yóʼo. Ta̱yóʼo kúú ta̱ Judas Iscariote. ¿Ndachun chi̱tura nu̱ú ta̱ Jesús?

Ta̱ Jesús ni̱nda̱ka̱tu̱ʼunra ta̱ Judas: ʼJudas, ¿á xíʼin ña̱ chi̱tún nu̱íi̱ yóʼo kúni̱ kachiña ña̱ taxiún yi̱ʼi̱ ndaʼa̱na?ʼ Ta ña̱ chi̱tu ta̱ Judas nu̱ú ta̱ Jesús, ña̱yóʼo kúúña iin seña ña̱ va̱ʼa ná kunda̱a̱-inina ta̱yóʼo kúú ta̱ Jesús. Tasaá ti̱inna ta̱ Jesús. Soo ta̱ Pedro kǒo xíínra taxira ná ku̱ʼu̱n ta̱ Jesús xíʼinna chi kúni̱va ta̱yóʼo kanitáʼanra xíʼinna. Ta ta̱vára yuchu̱ra ta xa̱ʼndara so̱ʼo iin ta̱ níndichi yatin nu̱úra. Soo ta̱ Jesús sa̱ndáʼara so̱ʼo ta̱yóʼo.

Ta̱ Jesús ni̱ka̱ʼa̱nra xíʼin ta̱ Pedro: ʼNdachika̱a̱ va̱ʼa yuchu̱ún nu̱ú ndíka̱a̱ña. ¿Á kǒo kúchiñui̱ ndukúi̱ ndée nu̱ú Yivái̱ ña̱ chindaʼára ku̱a̱ʼání na̱ ángel ña̱ kixina sáka̱kuna yi̱ʼi̱ túviún?ʼ. Kiviva ndukúra ndée nu̱ú yivára. Soo kǒo níxiinra chi xíni̱ra ña̱ ki̱xa̱a̱ tiempo ña̱ ku̱ʼu̱nra xíʼin na̱ sáa̱-ini xíniñaʼá. Vitin ná kotoyó ndáaña ndóʼo ta̱ Jesús.