Tanojnots 100

Jesús moajsik itech xochital

SATEPAN keman Jesús uan itatitaniluan kiskej itech kali tein moajsia ajko, yajkej itech xochital Getsemaní, kampa achto ipa miakpaya yajkaj. Jesús kiniluij maj ijsatonij uan maj kichiujtonij netataujtil, uan yej yajki okachi taixpan, motankuaketsak, moixpiloj uan peuak kichiua netataujtil.

Satepan Jesús mokepak kampa yetoyaj itatitaniluan. ¿Toni timoluia kichiujtoyaj? ¡Kochtoyaj! Expa Jesús kiniluij ika monekia ijsatoskej, sayoj ika nochipa keman yaya kinitati, kinajsia kochtokej. Jesús kiniluij keman kinitato ika expa: ‘¿Keniuj ueli nankochij itech se youak kemej nejin? Ajsika hora keman nechtemaktiskej imimako taixnamikinij’.

Keman tajtojtoyaok, mokakik miakej taltikpakneminij ualayaj. ¡Xikita! ¡Uitsej takamej ika imin espadas uan kuoujmej! Uan kiualkuij okot tein ika motauilijtiuitsej. Keman motokijkej, se takat kisak kampa yetoyaj taltikpakneminij uan kiajsito Jesús. Kipitsoj kemej tikita nikan. ¡Nejin takat yejua Judas Iscariote! ¿Keyej kipitsoj Jesús?

Jesús kitajtanij: ‘Judas, ¿tinechtemaktiti yejika tinechpitsoua?’ Kemaj, ijkuak kipitsoj katka se neskayot. Ika nejon, Judas kinimatiltij takamej ika yejuaya katka Jesús, akin kitemouayaj. Yejika, taixnamikinij okachi motokijkej uan ijkon kikitskiskiaj Jesús. Sayoj ika Pedro amo kinkauaskia maj ijkonisaj kiuikanij Jesús. Kikixtij iespada tein kiuikaya uan kisouilij takat tein achka yetoya. Uan kinakaskotonak iyekmakopa. Sayoj ika Jesús kinakasmatokak takat uan kipajtij.

Jesús kiiluij Pedro: ‘Xikeua moespada kampa tikixtij. ¿Timoluia ika amo ueli niktajtania noPopaj tel miakej ángeles maj nechmakixtikij?’ ¡Kemaj uelia! Sayoj ika Jesús amo kitajtanij Dios maj kintitaniliani ángeles, porin yej kimatia ika ajsikaya tonal keman kiuikaskiaj taixnamikinij. Yej kinkauak maj kichiuanij nejon. Maj tikitakan toni kipanok Jesús satepan.

Mateo 26:36-56; Lucas 22:39-53; Juan 18:1-12.