TLAPOUALISTLI 100

Jesús itech xochitlali Getsemaní

IJKUAK kisaj itech non kali, Jesús uan itlatitlaniluan yaui itech xochitlali Getsemaní. Achto miakpa nikan youiuitsaj. Axkan Jesús kinmiluia ma ijsatokan uan ma motlatlaujtikan, uan ompa kinkaua, motlankuaketsa uan motlatlaujtia.

Satepan, Jesús omokuepki kanin okatkaj itlatitlaniluan. ¿Tlen tikneltoka okichijtokaj? ¡Okochtokaj! Eyijpa Jesús okinmilui ma ijsatokan, maski ijkon, ijkuak ye omokuepaya itlatitlaniluan okochtokaj. Ijkuak saiktlami okinmitato, Jesús okinmilui: ‘¿Tleka nankochtokej? Yoajsiko kauitl pampa akinmej nechkokolia nechuikaskej’.

San niman, omokak ompa oyayaj miakej tlaltikpaktlakamej. ¡Xikita! Tlakamej okiuikayaj inespadas uan kuauitl. Noijki okiuikayaj tlitl tlen ika omotlauiliayaj. Ijkuak tlaltikpaktlakamej yiajsitokaj, intlajkotian okiski akaj tlen okachi omotoki inauak Jesús. Ken tikita itech tlaixkopinal, okixpipitso. ¡Nin tlakatl ye Judas Iscariote! ¿Tleka okixpipitso Jesús?

Jesús okitlajtlani: ‘Judas, ¿ijkon tinechtemaktilia?’. Kema, okixpipitso pampa ijkon omoka kichiuaskia. Ijkon, tlakamej akinmej oyayaj iuan Judas okimatkej akin ye Jesús, akin yejuan okitemoayaj. Ik non, akinmej okikokoliayaj Jesús, san niman okikitskijkej. Maski ijkon, Pedro amo okinkauili ma kiuikakan Jesús san ijkon. Okikixti iespada uan okitekili inakas se tlakatl tlen ompa okatka. Maski ijkon, Jesús okikitskili inakas tlakatl uan okipajti.

Jesús okilui Pedro: ‘Xiktlali espada kanin okatka. ¿Amo tikmati uelis niktlajtlanilis noTajtsin ma kintitlani sapanoa miakej ángeles pampa ma nechmakixtikan?’. ¡Kema ueliskia! Maski ijkon, Jesús amo okitlajtlanili toTajtsin Dios ma kintitlani ángeles, pampa ye okimatiaya yoajsik tonal pampa kiuikaskiaj akinmej okikokoliayaj. Ye okitekauili ijkon ma pano. Axkan, ma tikitakan tlen okipanok Jesús.

Mateo 26:36-56; Lucas 22:39-53; Juan 18:1-12.