ETYI vatunda mondyuo onene, Yesu nono apostolu mbae vaya kotyikunino tyo Getsemani. Ankho veholiale okuendako. Yesu pahe evetolela okuti muhalalei, likuambelei. Ahondovokapo katutu, elipetamena opo elikuambele.

Konyima, Yesu akondoka apa ankho pekahi ono apostolu mbae. Utyii oityi ankho vekahi nokulinga? Ankho velele. Yesu evetolela ovikando vitatu opo vahalale, mahi, etyi akondoka uvevasa velele. Otyikando tyahulako, etyi Yesu akondoka wevepula okuti: ‘Mulele momuvo ngou? Omuvo wehikapo opo ndyipakulwe konondyale mbange.’

Momuvo watyo oo, veiva otyinyingi tyovanthu tyikahi nokuyuela. Ankho ovalume vekahi nokuiya nomitunga novimuti. Tupu ankho vatyinda ovimimikilo pala okuveavela otyitei. Etyi vehika popepi, patunda umue pokati kovanthu ovo iya aende alo pu Yesu. Emuavela ombesinyu, ngetyi uluete polutalatu apa. Omulume oo, o Judas Iskariote. Omokonda yatyi aavelela Yesu ombesinyu?

Yesu apulu okuti: ‘Judas, ukahi nokumphakula nombesinyu?’ Ombesinyu ankho enyingilikilo. Judas ankho ukahi nokulekesa kovalume ovo okuti ou o Yesu, omulume muhanda. Ngotyo, onondyale mba Yesu avemukuata. Mahi, Petulu kahandele Yesu aye vala ngotyo avahalu. Wapola omutunga ankho ena ahande okutoma omulume ankho ukahi popepi nae. Anthi, omutunga kawehikile komutue womulume oo, mahi wemuteta vala okutwi. Mahi Yesu akuate kokutwi kuomulume oo iya akukala nawa.

Yesu atolela Petulu okuti: ‘Kondola omutunga wove motyilalo. Kutyii okuti ame ndyipondola okuita ku Tate yange onoandyu ononyingi pala okundyovola?’ Enga, ankho upondola. Mahi Yesu kaitile ku Huku atumikise onoandyu, mokonda ankho utyii okuti omuvo wehikapo opo onondyale mbae mbumukuate. Ngotyo wayeka vemutuale. Pahe tutalei oityi tyapita na Yesu.