Ekitebyo 100

Yesu omu Musiri

KU BAARUGIRE omu kishengye ky’ahaiguru omuri kaanyinaibiri, Yesu n’entumwa ze baagyenda omu musiri gwa Gesesemaani. Emirundi mingi bakaba bakira kwija aha. Hati Yesu agambira abeegi be kuguma nibareeba kandi nibashaba. Mbwenu we ayeyongyerayo kakye omu maisho afukama, ainika omutwe ahansi, ashaba.

Bwanyima Yesu agaruka enyima ahu entumwa ze ziri. Mbwenu nooteekateeka ngu nibakora ki? Bagwejegyeire! ‘Emirundi eshatu Yesu abagambira ku bashemereire kuguma nibareeba, kwonka buri kugaruka ashanga bagwejegyeire. ‘Nimubaasa muta kugwejegyera aha bwire nk’obu?’ Eki Yesu akigamba aha murundi gu yaahererukire kugaruka. ‘Eshaaha yangye yaahika ey’okuhebwayo aha bazigu bangye.’

Omu kaanya ako orwari rw’abantu baingi niruhurirwa. Reeba! Abashaija nibaija n’ebisyo n’ebikoni! Kandi baine n’emuri z’okubamurikira. Ku bairire haihi, omuntu yaaruga omu mutwe muhango gw’abantu yaizira kimwe haihi na Yesu. Yaamunywegyera nk’oku orikureeba aha. Omushaija ogu ni Yuda Iskaryota! Ahabw’enki naanywegyera Yesu?

Yesu amubuuza ati: ‘Yuda, noondebya n’okunywegyera?’ Eego okunywegyera n’akamanyiso. Kaamanyisa abashaija abari na Yuda ngu ogu niwe Yesu, omushaija ou barikwenda. Batyo abazigu ba Yesu baija bamukwata. Kwonka Petero tarikwikiriza ngu batware Yesu hatabaireho ndwano. Atyo asyorayo rurara ei yaabaire aizire nayo, agiteera omushaija owaabaire amuri haihi. Rurara eburaho kakye kutema omutwe gw’omushaija kwonka emusharaho okutu kwa buryo. Kwonka Yesu akwata okutu kw’omushaija akugaruraho.

Yesu agira Petero ati: ‘Garura rurara yaawe omu kyobati kyayo. Nooteekateeka ngu tindikubaasa kushaba Tata, obukumi n’obukumi bwa baamaraika okwija kunjuna?’ Eego, naabaasa! Kwonka Yesu tashaba Ruhanga kumuheereza maraika n’omwe, ahabw’okuba naamanya ngu obwire bw’okutwarwa abazigu be bwahika. Atyo areka baamutwara. Hati ka tureebe ekiraabe ahari Yesu.

Matayo 26:36-56; Luka 22:39-53; Yohaana 18:1-12.