MEKƐ mɔɔ Gyisɛse nee ye ɛzoanvolɛma ne vile ekpumgbunli ne mɔɔ wɔ ɛbolɔnsam ne azo la anu la, bɛhɔle Gɛtesɛmani tola ne anu. Bɛra ɛke fane dɔɔnwo. Gyisɛse akee hanle hilele bɛ kɛ bɛzinza na bɛzɛlɛ. Akee ɔhɔle ɔ nyunlu ekyii, na ɔbutule kɛ ɔsɛlɛ.

Nzinlii Gyisɛse ziale rale ɛleka mɔɔ ye ɛzoanvolɛma ne wɔ la. Duzu a ɛdwenle kɛ ɛnee bɛlɛyɛ a? Ɛnee bɛlafe! Gyisɛse hanle hilele bɛ fane nsa kɛ bɛzinza, noko mekɛ biala mɔɔ ɔkɛzia ɔkɛra la ɔnwu bɛ kɛ ɛnee bɛlɛda. Mekɛ mɔɔ li amozi mɔɔ Gyisɛse ziale rale la ɔzele bɛ kɛ: ‘Kɛzi bɛkola bɛda wɔ mekɛ mɔɔ le kɛ ɛhye anu ɛ? Mekɛ ɛdwu kɛ bɛye me bɛwula me kpɔvolɛma asa nu.’

Wɔ zɔhane mekɛ ne anu ala bɛdele menli dɔɔnwo ane. Nea! Menli ne dedɛ dadeɛ nee ahoholombaka! Na bɛdedɛ tɛkɛ mɔɔ bamaa bɛanwu aze a. Mekɛ mɔɔ bɛbikyele ɛkɛ ne la, awie vile menli ne anu vindele na ɔhɔle Gyisɛse anwo ɛkɛ ne. Ɔvole ɔ nloa anwo, kɛmɔ ɛnwu ye wɔ ɛke la. Nrenya ne a le Dwudase Yesekaleɔto! Duzu ati a ɔvole Gyisɛse anloa anwo a?

Gyisɛse bizale ye kɛ: ‘Dwudase, ɛdua me nloa anwo ɛvolɛ zo wɔaye me wɔamaa ɔ?’ Ɛhɛe, bɛ nloa anwo ɛvolɛ ne le sɛkɛlɛneɛ. Ɔmanle menli ne mɔɔ nee Dwudase lua la nwunle kɛ ɛhye a le Gyisɛse, nrenya ne mɔɔ bɛkpondɛ ye la. Yemɔti Gyisɛse kpɔvolɛma ne rale bɛ nyunlu na bɛhyele ye. Noko ɛnee Pita ɛnrɛmaa bɛnrɛva Gyisɛse bɛnrɛhɔ mgbane mɔɔ ɔngo a. Ɔhwenle ye dadeɛ ne na ɔvale ɔpɛle nrenya ne mɔɔ bikye ye la. Dadeɛ ne anga nrenya ne ati na ɔpɛle ɔ nzo fema ne. Noko Gyisɛse vale ɔ sa hanle nrenya ne anzo ne na ɔyɛle ye ayile.

Gyisɛse zele Pita kɛ: ‘Fa wɔ dadeɛ ne wula ye boa ne anu. Ɛnze kɛ mekola mɛsɛlɛ me Ze moalɛ na ɔmaa anwumabɔvolɛma apenle apenle badie me ngoane ɔ?’ Ɛhɛe, ɔkola ɔyɛ! Noko Gyisɛse anzɛlɛ Nyamenle kɛ ɔzoa anwumabɔvolɛma biala, ɔluakɛ ɛnee ɔze kɛ mekɛ ɛdwu kɛ ye kpɔvolɛma asa ka ye. Yemɔti ɔmanle bɛvale ye bɛhɔle. Maa yɛnlea mɔɔ akee dole Gyisɛse a.