MꞌE̱FA de bi bo̱ni de näꞌä däta kuarto, rä Hesu ꞌne yä apostol bi ma pa ha rä uädri Jetsemäni. Ya xki ꞌñehe ha nunä luga ndunthi yä mꞌiki. Pe nubye̱ rä Hesu bi ꞌñembäbi nuꞌu̱ yä apostol ge hindä ñꞌähä ꞌne ge dä xatuäbi Äjuä. Rä Hesu bi ꞌuege de geꞌu̱ nꞌa tu̱i, bi ndandiñähmu ꞌne bi mu̱di bi xatuäbi Äjuä.

ꞌNepu̱ rä Hesu bi mengi pa habu̱ xki gohi yä apostol. ¿Gi pädi te mi pe̱fi nuꞌu̱ yä apostol? ¡Mi ähä! Rä Hesu xki xipi hñu mꞌiki ge hindä ñꞌähä, pe kada mi pengi rä Hesu mi tsu̱di nuꞌu̱ yä apostol xa mi ähä. Hä näꞌä rä hñu rä mꞌiki rä Hesu bi ꞌñembäbi: “¿Por hanja gi ähähu̱? Ya bi zo̱ho̱ rä ora pa dä tꞌe̱nꞌkägi ha rä yꞌe̱ nuꞌu̱ mä nkontra”.

Nse̱kitho, bi ntꞌo̱de bi njohni xa ndunthi yä jäꞌi. ¡Hyandi! ¡Mi xä mani rꞌa yä ñꞌo̱ho̱ ko yä majuai ꞌne yä zaa! Mi hñä yä antorcha pa mi ñotꞌi. Mi zo̱ni nuꞌu̱ yä jäꞌi, nꞌa de geꞌu̱ bi uatꞌi rä Hesu ꞌne bi zu̱ꞌtsi ja ngu gi handi ha rä kꞌoi. ¡Nuni ñꞌo̱ho̱ go gehni Judas Iskariote! ¿Gi pädi por hanja bi zu̱ꞌtsi rä Hesu?

Rä Hesu bi ꞌñembi: “Judas, ¿ko nꞌa ntsu̱ꞌtsi gi traisionägi?”. Hää, näꞌä ntsu̱ꞌtsi geꞌä mi nꞌa rä señä pa njabu̱ nuꞌu̱ yä ñꞌo̱ho̱ mi ñꞌoui Judas bi bädi mi toꞌo rä Hesu. Hänge nuꞌu̱ yä nkontra bi uatꞌi pa bi gu̱ rä Hesu. Pe rä Pedro hingä ma xä pontꞌätho yä yꞌe̱. Hänge bi gu̱ki näꞌä rä majuai mi hñä ꞌne bi hye̱kuäbi rä gu nꞌa de nuꞌu̱ yä ñꞌo̱ho̱ mi ꞌmai getbu̱ de geꞌä. Pe rä Hesu bi dambäbi rä gu näꞌä ñꞌo̱ho̱ ꞌne bi yꞌo̱the.

Rä Hesu bi ꞌñembäbi Pedro: “Pe̱ꞌtsi ri majuai ha rä ntꞌoo. ¿Hage hingi pädi ge dä za gä apäbi mä Dada dä pe̱nkägi yä mꞌotho yä e̱nxe̱ pa dä ñängägi?”. ¡Rä Hesu hää xä za xä jabu̱! Pe näꞌä himbi yꞌapäbi Äjuä dä me̱mpäbi yä e̱nxe̱, ngeꞌä mi pädi ge ya xki zo̱ho̱ rä ora pa xä tsꞌitsꞌi. Hänge bi hyopäbi nuꞌu̱ yä nkontra bi gu̱u̱. Nubye̱ ma gä handihu̱ te bi thogi rä Hesu.