CHIʼ xeʼel bʼi pa ri nimalaj ja, Jesús xuqujeʼ ri täq apóstoles xebʼe pa jun lugar ubʼiʼ Getsemaní. Nabʼe kanoq e petinäq waral kʼi täq mul. Kimik Jesús xubʼij chike ri täq apóstoles che kewar täj xuqujeʼ rajawaxik kkebʼan kichʼawem, tekʼuriʼ xqebʼ panoq, xukeʼik tekʼuriʼ xubʼan uchʼawem che ri Ajawaxel.

Tekʼuriʼ Jesús xtzalij pa ri lugar jachiʼ e kʼo wi ri täq apóstoles. ¿Sulaʼ kabʼij at che tijan kkebʼano? ¡E waranäq! Oxibʼ mul Jesús xubʼij chike che rajawaxik che kewar täj, tekʼuriʼ ktzalij loq tijan kewarik. ‹¿Suche kixwar pa wajun chaqʼabʼ riʼ?› Xchaʼ Jesús chike chiʼ xtzalij lo ukʼisbʼal re. ‹Xopan ri qʼij che kinjach pa kiqʼabʼ ri täq nukʼulel›.

Tekʼuriʼ xketa täq kichʼabʼal kʼi täq winaq. ¡Chawilampeʼ! ¡E petinäq achijabʼ rukʼ täq chʼichʼ xuqujeʼ rukʼ täq cheʼ! Xuqujeʼ kekʼam täq kiqʼaqʼ rech kukʼut kibʼe. Chiʼ naqaj chik e kʼolik, xel lo jun che kixoʼl ri winaq tekʼuriʼ xpe rukʼ Jesús. Xutzʼumaj upalaj ri Jesús. ¡Wajun achi are Judas Iscariote! ¿Suche xutzʼumaj upalaj ri Jesús?

Jesús xuta wariʼ: ‹Judas, ¿kinakʼayij rukʼ jun tzʼumanik?› Jeʼ, wajun tzʼumanik riʼ xa jun etal xuya Judas. Xukʼut chike ri achijabʼ, ri e kʼo rukʼ Judas che are Jesús, ri tijan kketzukuj. Rumal laʼ ri täq ukʼulel ri Jesús xeqebʼ rukʼ rech kkechap bʼik. Tekʼuriʼ Pedro kuya täj che kkʼam bʼi ri Jesús. Xresaj lo jun chʼichʼ tekʼuriʼ xukoj che ri achi kʼo naqaj che. Xresaj jun uxikin. Tekʼuriʼ Jesús xukunaj ri uxikin ri achi.

Jesús xubʼij wariʼ che Pedro: ‹Chatzalij ri chʼichʼ pa ulugar. ¿La awetaʼm täj che kinkunik kinta sibʼalaj täq e kʼi ángeles che ri Nutat rech kinutoʼ?› ¡Kkunik! Tekʼuriʼ Jesús xuta ta wariʼ che ri Ajawaxel, rumal che retaʼm che xopan ri qʼij che ri täq ukʼulel kkekʼam bʼik. Kʼot xubʼano che xkebʼan wariʼ ri ukʼulel che. Chqilampeʼ su xuriq ri Jesús.