MURI ake i te akaruke anga i te pia i runga, kua aere atu a Iesu e tana au apotetoro ki roto i te aua o Getesemane. E maata to ratou taime e aere mai ana ki konei i mua atu ana. Teianei kua karanga a Iesu kia ratou kia ara ua e kia pure. I reira kua aere aia kia mamao atu, e kua piko ki raro i te enua i te pure.

Muri mai kua oki mai a Iesu ki ko i tana au apotetoro. Eaa toou manako ta ratou e rave ra? Kua moe ratou! Kua akakite a Iesu e toru taime kia ratou kia ara ua, inara i te au taime tataki tai iaia me oki mai kua kite aia ia ratou e moe ra. ‘Akapeea i rauka ai ia kotou te moe i teia taime tikai?’ i tuatua ei a Iesu i tona oki openga anga mai. ‘Kua tae te ora i te oronga iaku ki toku au enemi.’

I te reira rai taime kua akarongoia atu te maniania a tetai pupu tangata maata. Akara ana ra! Te aere maira te au tangata e ta ratou au koke e te au rakau! E te apai ra ratou i te au mori ei turama ia ratou. Vaitata anga mai ratou, kua aere roa mai tetai tangata mei te pupu tangata e kua akatika atu ki ko ia Iesu. Kua ongi aia iaia, mei taau rai e kite ra i konei. Ko Iuda Ikariota teia tangata! Eaa aia i ongi ei ia Iesu?

Kua ui a Iesu e: ‘E Iuda, te pikikaa mai ainei koe iaku i te ongi?’ Ae, e akairo te ongi. Te akakite ra ki te au tangata i ko ia Iuda e ko Iesu teia, te tangata ta ratou e inangaro ra. No reira te au enemi o Iesu i opu ei iaia. Tera ra kare a Petero e akatika ia ratou kia apai ia Iesu ma te kore e arai anga. Kua uuti mai aia i te koke tana i apai mai e kua pari i te tangata i te pae iaia. Kua tipu te koke i te taringa o te tangata kare ra i tona katu. Inara kua amiri a Iesu i te taringa o te tangata e kua akaora i te reira.

Kua akakite a Iesu kia Petero e: ‘Akaoki i taau koke ki tona ngai. Kare ainei koe i kite e ka rauka iaku te pati ki toku Metua no te au tauatini angera ei akaora iaku?’ Ae, ka rauka iaia te reira! Tera ra kare a Iesu i pati ana ki te Atua kia tono mai i te au angera, no te mea kua kite aia e ko te taime teia no tona au enemi i te apai iaia. No reira kua akatika aia ia ratou kia taki atu iaia. Ka akara ana tatou e eaa tei tupu kia Iesu i teianei.