YESUUSINNA hawaariyaatesi fooqete mininni fultu gedensaanni, Geetesemaani yinanniwa kaashshu base hadhu. Konni albaanni hakko bayichcho duuchcha higge martino. Yesuusi hakkiichcho hawaariyaatesi baqqi yite agadhitanno gedenna huuccatto assidhanno gede kulinsa. Hakkiinnino insawiinni shiima geeshsha xeertire, albisinni uulla uwe huuccatto assiri.

Hakkiinnino Yesuusi hawaariyaatesi noowa dayi. Daanno wote insa ma assitanni nooha lawannohe? Goxxe no! Yesuusi sase hige baqqi yite agadhitanno gede kulinsa; insa kayinni isi maranno kiiro goxxe no. Yesuusi goofimarchoho dayitera togo yiinsa: ‘Togoo yannara hiitto goxxinanni? Diinnaˈya amaddannoe yanna iillitino.’

Yesuusi coyiˈre kaˈˈanni heeˈreenna, lowo manni huuro macciishshantu. Kuneeti lai! Mannootu bise, dullanna caabbichcho adhite dagganni no! Mulira shiqqi yituta, insa giddonni mittu manchi fule Yesuusiwa mari. Koye misilete aana laˈˈattonte gede, manchuno Yesuusa sunqi. Hakku manchi Asqorootu Yihudaati! Isi Yesuusa sunqinohu mayiraati?

Yesuusi togo yee xaˈmisi: ‘Yihuda, sunqittoehu sayisse aattoeraati?’ Yihuda sunqinohu maalatehooti. Korkaatuno ledosi noo mannooti isi sunqi manchi insa hasidhanni nooha Yesuusa ikkinota affanno gedeeti. Konni daafira Yesuusi diinna, amaddasira shiqqi yitu. Ikkollana Pheexiroosi kuri mannooti Yesuusa haadhe hadhannota hoolate ola kayisara hasiˈrino. Adhe dayino bise fushshe, mulesi noo mancho gani. Biseno manchoho umo sodhe qiniitichcho maccasi murte tayissu. Yesuusi kayinni manchu macca amammade hursi.

Yesuusi Pheexiroosi togo yii: ‘Bise bayichchose qoli. Anniˈya kumunni kiirranni sokkaano soye gatisannoe gede xaˈmira dandeemmota diafootto?’ Eewa xaˈmira dandaanno! Ikkollana Yesuusi diinnasi amaddannosi yanna iillitinota afino daafira, Maganu mitto sokkaancho nafa soyasira dixaˈmirino. Konni daafira mannootu amaddannasi sammi yii. Yesuusa amadde hiissituro hanni laˈno.