NDA̱WA̱Á rí nigájna̱a̱ náa cuarto rúʼko̱, Jesús gajmíi̱n apóstoles nagún náa ixi̱ ri̱ʼi̱ dí rígá náa Getsemaní. Mbaʼa nutu má eʼni rí naguwaʼ gi̱i̱ nákha ginii. Rí xúgi̱ Jesús naʼthún rí xúnuʼ ga̱jma̱a̱ naʼthún rí mutakañii Dios, ga̱jma̱a̱ ikhú naʼnetsingunʼ lájuíin mu masmbátigo̱o̱ maʼtajkháan.

Nda̱wa̱á Jesús natanga̱a̱ náa kuwa apóstoles ndrígóo. Ndiéjunʼ tatsaʼwáminaʼ ikháánʼ rí kuwa runi xá. ¡Ikhiin kuwa runuʼ! Ajtsú nuthu má eʼni rí Jesús naʼthún rí xúnuʼ, mu mámbá rí natanga̱a̱ ikhiin kuwa runuʼ. Jesús naʼthún índo̱ natanga̱a̱ nda̱wa̱á kayuʼ: ‹Náa numuu rí nunuʼla, mbiʼi xóo rígi̱ rá. Ni̱jkha̱nú mbiʼi rí muxnaxu̱u̱n náa xa̱bu̱ bi̱ sia̱nʼ gajmíi̱n’›.

Núkhu má ikhú nawán rí naguwáʼ mbaʼin wéñuʼ xa̱bu̱. ¡Atayáá! ¡Xa̱bekha naguwáʼ kuñu̱u̱n chídí ga̱jma̱a̱ ixi̱! Ga̱jma̱a̱ kuya ixi̱ rí nakhamu mu mambiʼi náa magun. Índo̱ naguanu mijngii, ikhú mbáa xa̱bu̱ nagájnuu náa tapuún xa̱bu̱ bi̱ mbaʼin ga̱jma̱a̱ na̱ʼkha̱ náa wíji̱ Jesús. Na̱ʼkhu̱ chituʼ, xóo má tayáá gi̱i̱ náa kiʼniriyaʼ. ¡Xa̱biya̱ bugi̱ nindxu̱u̱ Judas Iscariote! Náa numuu rí na̱ʼkhu̱ chituʼ Jesús rá.

Jesús naraxi̱: ‹Judas, lá a̱jma̱ inaʼ thani ga̱jma̱á ni̱ndxu̱ʼ rí natsu chituʼ ráʼ.› Xúʼko̱, rí na̱ʼkhu̱ chituʼ nindxu̱u̱ mbá tsinaʼ. Naʼni rí xa̱bekha bi̱ xtáa gajmíi̱n Judas mbuyáá rí xa̱biya̱ bugi nindxu̱u̱ Jesús, bi̱ ikhiin kuwa ruyáʼ. Ikha jngó xa̱bu̱ bi̱ guáʼdáá sia̱nʼ náa Jesús nagún mijngii mu murtuwiin. Mú Pedro xaniñaminaʼ rí magún kuya̱a̱ Jesús. Nariyaʼ chídí rí kayá ga̱jma̱a̱ narujtu chaʼun dí rígá náa ñawún mújúnʼ xa̱biya̱ bi̱ wíji̱ mijngii náa wíji̱ ikhaa. Mú Jesús nagugua chaʼun xa̱biya̱ ga̱jma̱a̱ naʼni̱i̱la.

Jesús naʼthúu̱n Pedro: ‹Ataxúmáʼ chídí náa xtóo. Lá natatsaʼwáminaʼ rí xándoo mando̱ʼo̱o̱ Anu̱ʼ mbaʼin wéñuʼ ángeles mu munikríñunʼ ráʼ.› ¡Ma̱ndoo maʼni! Mú Jesús na̱nguá nindo̱ʼo̱o̱ Dios rí makuʼmiin ángeles, numuu rí ndaʼyoo rí ni̱jkha̱nú mbiʼi magún kuya̱a̱ xa̱bu̱ bi̱ sia̱nʼ gajmíi̱n. Ikhaa naniñaminaʼ rí murtuwiin. Rí xúgi̱ guʼyáá ndiéjunʼ egiʼnuu Jesús.