JESUS no ninia apóstolu sira tun husi sala andár-leten, depois sira bá jardín naran Jetsémani. Sira mai iha neʼe dala barak ona. Agora, Jesus haruka sira atu matan-moris hela no halo orasaun. Nia bá dook uitoan hodi hakneʼak no hakruʼuk toʼo rai atu halo orasaun.

Tuirmai, Jesus fila ba fatin neʼebé apóstolu sira tuur hela. Sira halo saida iha neʼebá? Sira toba hela! Dala tolu Jesus haruka sira atu matan-moris hela, maibé nia fila no haree sira dukur hela deʼit. Ba dala ikus kuandu nia mai fali, Jesus hatete: ‘Oinsá mak imi bele toba iha oras hanesan neʼe? Oras mai ona atu ema saran haʼu ba inimigu sira.’

Oras neʼe kedas, sira rona lian husi ema-lubun boot. Haree! Ema mai hodi lori surik no ai-dona! No mós, sira lori ahi-oan atu fó naroman. Bainhira sira mai besik liután, mane ida husi ema-lubun boot hakat ba oin no hakbesik ba Jesus. Nia reʼi Jesus, hanesan ó haree iha neʼe. Mane neʼe mak Judas Iscariotes! Tansá nia reʼi Jesus?

Jesus husu: ‘Judas, hodi reʼi haʼu mak ó sai traidór ka?’ Loos duni, reʼi mak sinál ida atu hatudu ba ema neʼebé hamutuk Judas katak nia mak Jesus, ida neʼebé sira buka. Nuneʼe, Jesus nia inimigu sira bá kaer nia. Maibé, Pedro lakohi husik deʼit ema lori Jesus no hakarak defende Jesus. Nia losu ninia surik neʼebé nia lori, no ataka mane ida besik nia. Surik kois mane neʼe nia ulun, no tesi tiha ninia tilun sorin loos. Maibé, Jesus tau liman ba mane neʼe nia tilun, no halo diʼak fali.

Jesus hatete ba Pedro: ‘Hatama ó-nia surik ba ninia fatin. Ó hanoin katak haʼu la bele husu haʼu-nia Aman atu haruka anju rihun ba rihun atu salva haʼu?’ Sin, nia bele! Maibé, Jesus la husu Maromak atu haruka anju ida, tanba nia hatene katak oras mai ona atu ninia inimigu sira kaer nia. Tan neʼe, nia husik sira lori nia. Mai ita haree saida mak akontese ba nia.