100-нҗи хекая

Иса багда

ИСА ве ресуллары ёкаркы отагдан чыкып, Гетсемани багына гитдилер. Бу ере олар өңем гелипди. Иса ресулларына оя болуп, дога этмелидигини айдяр. Өзи болса бираз араны ачып, йүзүни ере берип, дога этди.

Соң ресулларының янына баряр. Сениң пикириңче, олар нәме эдйәркә? Олар уклап ятыр! Иса олардан үч гезек оя болмагы хайыш эдйәр. Хер гезегем олар ятырка, үстлеринден баряр. Иса үчүнҗи гезек оларың янына доланып геленде: «Шу вагт сизиң нәдип укыңыз гелйәр? Мен душманларың элине хәзир берилйән ахырын» диййәр.

Ол энтек гепләп дурка, якынлашып гелйән адамларың сеси эшидилди. Ынха, эли гылычлы ве таяклы адамлар гелди. Шейле-де ёлы ягтылтмак үчин чыралары барды. Адамлар якынлашанда оларың арасындан бири Исаның янына гелйәр. Серет, ол Исаны огшаяр. Ол Иуда Искариот! Йөне ол Исаны нәме үчин огшаярка?

Иса оңа: «Иуда! Сен мени огшук билен сатяңмы?» дийди. Хава, Иуда Исаны огшап, яны билен гелен адамлара кимиң Исадыгыны гөркезди. Шонда душманлар Исаны тутмак үчин топулдылар. Эмма Петрус гаршылык гөркезди. Ол гылыҗыны алып, янындакы дуран адамың саг гулагыны кесди. Шонда Иса онуң гулагына элини дегрип сагалтды.

Иса Петруса: «Гылыҗыңы ерине сал. Я Мен Атама мүңлерче перишде ибер дийип билмез өйдйәңми?» дийди. Ол, догрудан-да, муны эдип билерди! Йөне Иса Атасындан перишделери ибермеги хайыш этмейәр, себәби оны душманлары тутмалыды. Шонуң үчин ол боюн боляр. Шейдип, Исаны алып гидйәрлер. Гел, соңра Иса нәме боланыны билели.

Матта 26:36—56; Лука 22:39—53; Яхя 18:1—12.