‘I HE mavahe ‘a Sīsū mo ‘ene kau ‘apositoló mei he loki ‘i ‘olungá, na‘a nau ‘alu atu ki he ngoue ko Ketisemaní. Na‘e tu‘o lahi ‘a ‘enau fa‘a ōmai ki heni ki mu‘a atu. Na‘e tala ange heni ‘e Sīsū ke nau ‘ā‘ā mo lotu. Peá ne ‘alu atu ia ‘o ki‘i mama‘o atu, peá ne fakafo‘ohifo hono fofonga ki he kelekelé ke lotu.

Hili iá na‘e foki mai ‘a Sīsū ki he feitu‘u ‘oku ‘i ai ‘a ‘ene kau ‘apositoló. ‘Okú ke fakakaukau ko e hā ‘a e me‘a na‘a nau faí? Na‘a nau mohe! Na‘e tu‘o tolu hono tala kiate kinautolu ‘e Sīsū ‘oku totonu ke nau ‘ā, ka ‘i he‘ene foki mai tu‘o tolú na‘á ne ‘ilo ai pē ‘oku nau mohe. Na‘e pehē ‘e Sīsū ‘i he‘ene ha‘u faka‘osí: ‘ ‘Oku malava fēfē ke mou mohe ‘i he taimi hangē ko ‘ení? Kuo hoko ‘a e taimi kiate au ke tuku atu ki he nima ‘o hoku ngaahi filí.’

‘I he mōmeniti pē ko iá na‘e lava ke ongona ha longoa‘a ‘a ha fu‘u kakai. Sio! Na‘e ha‘u ‘a e kau tangata mo e ngaahi heletā mo e ngaahi pōvai! Pea na‘a nau to‘o ha ngaahi tūhulu ke nau maama‘aki. ‘I he‘enau ofi maí, na‘e mavahe mai ha taha mei he fu‘u kakaí pea ha‘u fakahangatonu kia Sīsū. Na‘á ne ‘uma kiate ia, ‘o hangē ko ia ‘okú ke sio ki aí. Ko e tangatá ni ko Siutasi ‘Isikaliote ia! Ko e hā na‘á ne ‘uma ai kia Sīsuú?

Na‘e ‘eke ange ‘e Sīsū: ‘ ‘E Siutasi, ‘okú ke lavaki‘i au ‘aki ‘a e ‘umá?’ ‘Io, ko e ‘umá ko ha faka‘ilonga ia. Na‘e ‘ai ‘e he me‘á ni ke ‘ilo‘i ‘e he kau tangata na‘e omi mo Siutasí ko Sīsū ‘eni, ‘a e tangata ‘oku nau fiema‘ú. Ko ia na‘e laka mai ‘a e ngaahi fili ‘o Sīsuú ke puke ia. Ka ko Pita na‘e ‘ikai te ne tuku ke nau ‘ave ‘a Sīsū ‘o ‘ikai ke fai ha tau. Na‘á ne unuhi hake ‘a e heletā na‘á ne ‘omai ‘o ne taa‘i ‘a e tangata na‘e ofi ki aí. Na‘e hala ‘a e heletaá mei he fo‘i ‘ulu ‘o e tangatá ka ne motuhi ‘a hono telinga to‘omata‘ú. Ka na‘e ala ‘a Sīsū ki he telinga ‘o e tangatá ‘o fakamo‘ui ia.

Na‘e tala ange ‘e Sīsū kia Pita: ‘⁠Fakafoki ‘a ho‘o heletaá ki hono ‘ai‘angá. ‘Oku ‘ikai te ke ‘ilo ‘e lava ke u kole ki he‘eku Tamaí ki ha kau ‘āngelo ‘e toko laui afe ke fakahaofi au?’ ‘Io, na‘e malava ke ne fai pehē! Ka na‘e ‘ikai ke kole ‘e Sīsū ia ki he ‘Otuá ke fekau mai ha kau ‘āngelo, koe‘uhi he na‘á ne ‘ilo kuo hoko ‘a e taimi ke ‘ave ai ia ‘e hono ngaahi filí. Ko ia na‘á ne tuku ke nau taki atu ia. Tau sio ange pe ko e hā na‘e hoko kia Sīsuú.