TSAʼAN yajni elye ja bʼa kwarto jaw, Jesús sok ja snebʼumaniki jakye bʼa kʼachinubʼ Getsemaní. Jitsan ekʼele jakele ja bʼa lugar it. Ja weʼgo ja Jesús yala yabʼ ja snebʼumaniki kʼelan jakan aʼajyuke bʼa mok ochuk swayele sok ayawe yi orasyon, soka yeʼn ti jits-el jun makʼe, ti koʼ tinan sok och ya yi orasyon.

Tsaʼan, ja Jesús kumxi ja bʼay ja snebʼumaniki. ¿Wan maʼ xa naʼa jas wane skʼulajel ja snebʼumaniki? ¡Wane wayel! Oxe ekʼele ja Jesús yala yabʼ mok ochuk swayele, pe yajni wa xkumxi ja yeʼn, waneni wayel. Ja bʼa tsaʼanxta ekʼele kumxi ja Jesús yala yabʼye: «¿Jas yuj wa x-och awayelex bʼa jun tyempo jastal it? Ti kʼot ja yoraʼil oj yaʼone bʼa skʼabʼ ja matik wa xyilawone kontra».

Ja bʼa jutsʼin jaw abʼxi buya bʼa jitsan ixuk winik. ¡Kʼela! ¡Ja winikeʼi jakume sok yespadaʼe, steʼe sok ayiʼoje yajlubʼ skʼakʼe! Yajni mojxiyeʼi, jastal waxa wila bʼa dibujo, june bʼa yeʼnle eljan jak staʼ ja Jesús sok yujtsʼan. ¡Ja winik jaw jaʼa Judas Iscariote! ¿Jas yuj jak yujtsʼuk ja Jesusi?

Ja it juni senyaʼa. Jesús sjobʼo: «Judas, ¿sok jun ujtsʼanel waxa wiʼaj jpatik?». Ja ujtsʼanel it ja bʼa oj ya snaʼe ja winike matik smoj ja Judasi yeʼnani ja Jesús, ja maʼ wane sleʼjeli. Jachuk ja kontraʼanumiki mojxiyejani bʼa jak syam-e ja Jesús. Pe ja Pedro mini oj yakan jachʼ ita lom bʼa oj ijuk och ja Jesús. Ya eluk ja yespada sok sjaxa yi june ja winik tey bʼa stsʼeʼeli sok skʼutsuʼel yi ja bʼa stojol xchikini. Pe ja Jesús syama ja xchikin ja winiki sok ya tojbʼukyi.

Ja Jesús yala yabʼ ja Pedro: «Nolo jawa wespada. ¿Mi maʼ xa naʼa wani xbʼobʼ jkʼan yi ja jTati jitsan mil anjelik bʼa oj jak skoltayone?». ¡Ojni bʼobʼyuja! Pe ja Jesús mini skʼana yi ja Dyos a-sjekon anjelik yujni wa snaʼa kʼot ja styempoʼil bʼa oj ijuk och yuja skontraʼiki. Ja yuj ja Yeʼn yaʼakan akʼulajuk yi ja it. Ja weʼgo la kiltik jasa ekʼ sbʼaj ja Jesusi.