ENGA Jesusi ka imeri apostulichaksï uéntajkia kuarturhu, nirasïndiksï jardini Jetsemanirhu. Uánikua ueltaksï jurhastia ixú. Jesusi arhiasïndi eskaksï tsínharhitini jauaka ka eskaksï kómarhikua úni jauaka, ka jarhariasïndi sánitu, tʼénksatasïndi éjpuni ka uénasïndi kómarhikua úni.

Tátsekua, Jesusi andarheraantasïndi apostulichani. ¿Amberi exesïni eskaksï úxapka? ¡Kʼuíxatiksï! Jesusi tanimu uelta arhiasïndi eskaksï tsínharhitini jauaka, peruksï méntkisï kʼuíni jarhasïndi enga Jesusi kʼuanhatsintajka. Enga ultimu kʼuanhatsintajka ísï arhiasïndi: ‘¿Nénajtsï úsïni kʼuíni iásï?ʼ. Niárastia jurhiatikua parajtsïni juchiti ikiatspiticha jupikani.

Enga útasï ísï arhiani japka, kurhaakuarhesïndi uánikua kʼuiripu. ¡Exe! ¡Jurhaxatiksï achaaticha espada ka chkari ambe jingoni! Ka antorchechanksï kaasïndi paraksï erajkuni. Engaksï andarherani jarhajkia, nema sánderu sóntku jurhasïndi andarherani Jesusini. Ka eskari na exejka ixú, putinharhikusïndi. ¡Achaati, Judasï Iskariotisti! Peru, ¿andisï putinharhikujki Jesusini?

Jesusi arhisïndi: ‘Judasï, ¿putinharhikua ma jingonirini íntspentaxaki?ʼ. Jo, i putinharhikua úsïndi eskaksï imecha engaksï Judasïni jingoni jaka uákaksï mítintani Jesusini. Jimbosïksï Jesusiri ikiatspiticha andarherajti paraksï jupikani. Peru Pedru no jurajkuati eskaksï paaka Jesusini no kuájpintaparini. Jimbosï pʼiaarajti espadani ka indeni jingoni atasïndi achaatini ma enga jima no iauani jaka. Kachundikusïndi kutsïkuani jurhijkandani ladu anapuni. Peru Jesusi pʼándikusïndi achaatini ka tsinasïndi.

Jesusi arhisïndi Pedruni: ‘Inchaaranta espadani. ¿Nori exesïni tʼu eskani ji úpiringa kurhakuni juchiti Tátini mili jimbo ánjilichani parajtsïni kuájpintani?ʼ. ¡Jo, úpirindi! Peru Jesusi no arhisïndi Tata Diosïni eska axauaka ánjilichani, jimboka mítiska eska janoskia jurhiatikua paraksï páni. Ka Jesusi jurajkusïndi eskaksï paaka. Iásï ju exeni ambe úkuarhinchasïni Jesusi.