ИИСУС апостолдары-биле кырыккы өрээлден үнгеш, Гефсиман садынче углапкан. Мында олар бир дугаар эвес. Иисус апостолдарын удуур кылдыр эвес, а мөргүүр кылдыр кыйгырган. А боду ырак эвес чоруткаш, арнын черже доңгайып алгаш, мөргүп турар.

Ооң соонда Иисус апостолдарынга катап чедип келген. Олар чүнү кылып турар деп бодаар сен? Удуп чыдар! Иисус оларны удувас кылдыр үш катап дилээн, ынчалза-даа үш удаа кээрге, олар удуп чыдар болган. ‘Канчап мындыг үеде удуп шыдаар улус силер?— деп, Иисус олардан үш дугаар келгеш айтырган.— Шак бо үеде дайзыннарның холунче мени ам садыптар болгай’.

Ол-ла дораан чоокшулап олурар хөй улустуң шимээни дыңналган. Ол-дур! Селемелер база моңнар-биле чепселенген кижилер көстүп келген! Холдарында оруун чырыдар чырыткылар туткан. Кажан бөлүк улус чоокшулап кел чорда, оларның аразындан бир кижи үнүп келгеш, Иисустуң чанынга чедип келген. Көрем — ол Иисусту ошкап тур. Ол дээрге Иу́да Искарио́т! Ынчаарга Иисусту ол чүге ошкап кааны ол?

— Иу́да, ошкаашкын-биле мени садып турарың ол бе?— деп, Иисус айтырган. Ийе — ошкааны дээрге демдек-тир. Ол Иу́да-биле келген кижилерге Иисусту айтып берип турары ол-дур. Ынчан Иисусту тудуп алыр дээш, Иисустуң дайзыннары бурунгаарлап келген. Ынчалза-даа Пётр ону анаа белен бериксевес. Ол селемезин ужулгаш, чанында турар кижиже карбаш кылган. Бажынга бичии-ле дегбейн баргаш, оң талакы кулаан Пётр одура кезипкен. Ынчалза-даа Иисус кулакка дээпкеш, ону эмнеп каан.

Пётрга ол дужааган: ‘Селемең орнунче дедир сук. Мен Адамдан дилээр болзумза, ол меңээ дуза кылдыр муң-муң дээрниң төлээлерин чортуп болур деп, билбес эвес сен?’ Ол шынап-ла ону кылып шыдаар! Ынчалза-даа Иисус Адазындан дээрниң төлээлериниң дугайында дилевейн турар, чүге дизе билир: ам дайзыннарның ону аппаар үези. Ынчангаш ол чагыртырга, ону тудуп аппарган. Иисус-биле улаштыр чүү болур эвес, билип алыылам.