Tantara 100

Jesosy Tamy Zaridain̈y

JESOSY ndreky apostolinany aby io koa fa niala tan̈abo etazy in̈y, nandeha tamy zaridain̈y Getsemane. Izio tany fandihanan-drô. Jesosy nan̈iraka irô hiambin̈y ndreky hivavaka. Izy amy zay nandeha lavidavitry irô, nankôhoko tamy tany, nivavaka.

Koa fa refindrefiny, Jesosy nimpody tamy tany nisy apostoly aby in̈y. Ino raha nataon-drô? Irô nandry! Intelo aby Jesosy nivolan̈a tamin-drô fa irô tsy tôkony mandry, kanefa isaka izy mimpody, mahita irô mandry fo. Jesosy koa fa nimpody farany, izy nivolan̈a tamin-drô: ‘Nino mahavy anarô mandry amy lera iziô zalahy? Fahavalo aby io kony fa navy hangala zaho e.’

Niaraka tamy zen̈y, irô naharen̈y olo maro navy. Zahava lelahy aby mitaondra saboa ndreky koboay, navy io! Irô koa mitaondra môtro hampazava irô. Irô koa fa narikitry, nisy olo araiky nan̈aton̈o Jesosy. Nirôfiny Jesosy, karaha hitanao amy sary io. Izio Jodasy Iskariota! Nan̈ino ma izy niôroko Jesosy?

Jesosy nan̈ontany: ‘Hamadiky zaho ma dikan’ny ôrokonao Jodasy?’ Ôroko in̈y nisy dikany ankitin̈y. Lelahy aby in̈y efa nifan̈araka tamy Jodasy fa ôroko io ahaizan-drô Jesosy, olo tadiavin-drô. Fahavalon’i Jesosy aby in̈y amy zay nan̈aton̈o, hanambotro izy. Petera tsy nan̈eky irô hangala Jesosy karaha io fo. Nalainy mesobenany, baka iô nivangoeny lelahy araiky narikitry izy tiô. Lohan’ny lelahy io tsy navoa, fa sofin̈inany ankahery napoaka. Jesosy baka tiô nitosy sofin̈y lelahy in̈y, raha io amy zay nimpody tamy pilasiny.

Jesosy nivolan̈a tamy Petera: ‘Ampodiana amy tran̈ony mesobenao. Zaho ma ambaranao tsy mahavita mangataka anjely an-drivony amy Babako hamonjy zaho?’ Vitany tsarabe zen̈y! Jesosy fo tsy nangataka tamy Zan̈ahary handefa anjely, fôtony hainy fa tamin’io efa lera hangalan’ny fahavalonany izy. Ke izy nety nindesin-drô. Ino amy zay raha hahazo Jesosy iziô? Alô zahavatsika.

Matio 26:36-56; Lioka 22:39-53; Jaona 18:1-12.