ALI agambile kopoka mu cipinda camwinani cila, Yesu ni ŵandumetume ŵakwe akwawula ku mgunda wa Getisemane. Ndaŵi syejinji jemanjaji aŵele ali mkuyika kumgundawu. Yesu akwasalila ŵandumetume ŵakwe kuti aŵe mesope, soni apopeleje. Kaneko jwalakwe akwenda kalutando panandi, ni akukotimicisya mtwe wakwe pasi ni kupopelaga.

Patesile yeleyi, jwalakwe akuwujila kwali ŵandumetume ŵakwe ŵala. Ana akumanyilila yakutenda ŵandumetume ŵala? Ŵandumetumewo akugona! Katatu kose Yesu akwasalila kuti aŵe mesope, nambo ndaŵi jilijose jakuwujila kwali ŵandumetumewo, akwasimana ali mkugona.Yesu pakuwuja kakumalisya akuŵeceta kuti: ‘Ana wuli akugona pandaŵi mpela jeleji? Ndaŵi jikwanile sambano jakuti mbelecekwe kwa acim’magongo ŵangu.’

Pandaŵi jijojo pakupikanika kusinganga kwa likuga lyekulungwa lya ŵandu. Ŵalole ŵanduwo! Akwisa ni maupanga ni mbonga! Soni anyakwile yakumulicila kuti yalangucisyeje. Paŵandicile, mundu jwine mu likugalyo akwisa pali Yesu. Jwalakwe akumkomasya ni ngomo, mpela mwakuyiwonela apanomu. Munduju ali Yudasi Isikaliyoti! Ana ligongo cici akumkomasya Yesu ni ngomo?

Yesu akum’wusya kuti: ‘Yudasi, ana mkumbeleka une ni cikomasyo cangomo?’ Cikomasyoci cili cimanyisyo. Cikwakamucisya ŵandu ŵali ni Yudasiwo kumanyilila kuti Yesu jwakumsaka ali jweleju.Sambano acimmagongo ŵa Yesu akwisa kukumkamula. Nambo Petulo ngakukunda kuti jemanjaji agambe kumkamula Yesu mwangamenyana nawo. Jwalakwe akuswekula upanga wajigele ni akumkapa mundu jwaŵandikene najo. Upangawo nganiwum’yicila mundu jula mumtwe nambo umkatile liwiwi lyakumlyo. Nambo Yesu akujigala liwiwi lila nikumposya mundujo.

Yesu akumsalila Petulo kuti: ‘Wucisyani upanga mwigonelo mwakwe ana ngamkumanyilila kuti une mpaka naŵende Atati kuti ambe macilamacila ga malayika kuti gangulupusye?’ Elo, jwalakwe mpaka akombole! Nambo Yesu ngakum’ŵenda Mlungu kuti amtumicisye malayika, ligongo akumanyilila kuti ndaŵi jakwe jakuti acimmagongo amjigale jikwanile. M’yoyo akukunda kumjigala. Kwende sambano tulole yayikumtendecela Yesu.