Historia 100

Jesús nuu ndaaniʼ ti jardín

DESPUÉ de bireecabe de ndaaniʼ cuartu que la? Jesús ne ca apóstol stiʼ reedacabe ndaaniʼ jardín stiʼ Getsemaní. Huayeedarúcabe raríʼ stale biaje. Jesús rábibe ca apóstol que gatanacaʼ ne guni orarcaʼ, óraque riebe ti ladu ne runi orarbe.

Rapa si hora ribiguetaʼ Jesús ra nuu ca apóstol stiʼ. Xi raʼbuʼ cayúnicabe yaʼ. ¡Nisiaasicabe! Chonna tiru rabi Jesús laacabe de que naquiiñeʼ gatanácabe, peru cada guibiguétabe la? redandabe laacaʼ nisiaasicaʼ. Últimu biaje beeda Jesús riʼ na rabi laacabe: Ximodo nga laatu ganda gásitu yanna pue. Maʼ bidxiña hora guinaazeʼ ca xhenemiguaʼ naa.

Órapeʼ caniʼbe que runadiágacabe ridxi stiʼ stale binni. ¡Biiyaʼ! ¡Zeeda ca hombre ca ne espada ne palu! Ne nécabe antorcha para guzaaniʼ laacabe. Ora ridxíñacabe la? riree tobiládecabe ne ridxiña ra nuu Jesús. Rudiibe ti bixiduʼ laa casi ruuyuʼ lu dibuju ca. ¡Hombre ca nga Judas Iscariote! Xiñee rudiibe ti bixiduʼ Jesús pue.

Jesús rinabadiidxaʼ: Judas, ne ti bixiduʼ nga cutooloʼ naa la? Ya, bixiduʼ ca nga ti señal biquiiñeʼ Judas, ti ganna ca hombre nebe ca tuu nga Jesus ni laacaʼ cuyúbicaʼ. Nga runi, rireecabe de lade ca binni que ne rinaazecabe Jesús. Peru Pedru qué zudii lugar chinécabe Jesús sin qué gucaalú laacabe. Ribeebe espada stibe ne rugabe diaga hombre ni nuu gaxha de laabe. Peru Jesús rigaʼnaʼ diaga hombre que ne rusiándabe ni.

Jesús rábibe Pedru: Bidxiguetaʼ espada stiluʼ xlugar. Ñee cadi raʼbuʼ de que zanda guinabaʼ Bixhozeʼ gayuaa mil ángel para gulá naa la? ¡Zanda pue! Peru Jesús qué rinábadibe Bixhózebe guseenda ca ángel stiʼ, purtiʼ nánnabe maʼ bidxiña hora chiné ca xhenemígube laabe. Laabe rudiibe lugar guizaaca ca ndiʼ. Guidúʼyanu xi rizaacabe yanna.

Mateo 26:36-56; Lucas 22:39-53; Juan 18:1-12.