¡LELIFINGE tüfachi weda dungu ñi rupameken! Petu langümngey ta Jesu. Pültrüley kiñe mamüll mew. Külafantükuñmangey tañi kuwü ka ñi namün. ¿Chumngelu (chemu) ayüngeafuy ñi femngeal tüfa?

Kiñeke che am üdenielumu (üdeeyew) engün. ¿Eymi kimimi iney engün tüfa? Kiñe fey engün weda werken püllü Satana chi Weküfü. Kidu diturpufi Adan Eva engu ñi feyentunofiel (müngeltunofiel) Jewba. Ka Satana diturpuy Jesu tañi pu kayñe ñi femfiel tüfachi rume (mütre) weda femün.

Petu ñi külafantükungenon ti mamüll mew, Jesu ñi pu kayñe wedalkamekeeyew. ¿Tukulpafimi küpayngün ti anümkawe Getsemani pingelu mew, ka yengey? ¿Iney engün am tüfachi pu kayñe? Fey llemay, feyta pu longkolechi religioso. Pefiyiñ chem dungu rupay wüla.

Tati pu longkolechi religioso yefilu ta Jesu, tañi pu apostol lefmawi engün. Llükayngün, kidukünufi Jesu ñi pu kayñe engün. Welu ti apostol Pedro Juan engu, müte kamapu amulayngu. Inaniefingu ñi peal chem dungu ñi rupayal ta Jesu.

Tati pu saserdote yefi ta Jesu chew ñi mülen ti fücha wentru Anas pingelu, longko saserdote ngekefulu. Tati fentren pu che alüñma mülekalay faw. Fey wüla yefingün Jesu Kayfa ñi ruka mew, fewla am longko saserdote ngelu. Fentren pu longkolechi religioso mülepuy.

Faw Kayfa ñi ruka mew müley kiñe ramtukadungun. Küpalngey kiñeke wentru ñi koylatual Jesu mu. Kom pu longkolechi religioso feypi engün: ‘Müley ñi langümngeal Jesu.’ Fey mew tofkütuñmangey (chufkütuñmangey) ñi ange, ka wülelkangey.

Petu ñi rupan tüfa, Pedro müley wekuntu tati lepün mew. Wütrengey chi pun (trafia), ka tati pu che kütraltuy. Petu ñi eñümtulen engün inafül kütral mew, kiñe domo küdawkelu lelifi ta Pedro ka feypi: ‘Tüfachi wentru Jesu engu ka mülepey.’

‘¡No feyngelay, iñche mülepelan fey iñchiw!’ llowdunguy Pedro.

Tati pu che küla rupa feypifi ta Pedro: ‘Eymi ka mülepeymi Jesu emu.’ Welu Pedro küla rupa ‘¡Femngelay!’, pi. Küla rupa Pedro feypilu tüfa, Jesu wiñokintueyew ka leliwülfi. Pedro doy weñangküy ñi feypiel feychi koylake dungu, ka tripapatuy ta tiye mew, fey rume fütra ngümakawi.

Tripalu ti antü chi vierne puliwen mu, tati pu saserdote yefi engün ta Jesu tañi fütra trawüluwpeyüm (trawülwe), chew trawüluwküley Sanedrin pingelu. Tüfa mu petu inaduami engün chem ñi femafiel ta Jesu. Yengey chew ñi mülen Ponsio Pilato pingelu, longkolelu Judea trokiñ mapu mew.

Feypingey ta Pilato: ‘Tüfa weda wentru ngey. Müley ñi langümngeal.’ Fey wüla Pilato ramtukadungufilu ta Jesu, feypi: ‘Iñche peñmalafiñ chem weda dungu rume ñi femün.’ Fey mew, Pilato werküy ñi yengeal ta Jesu chew ñi mülen Erode Antipa pingelu, longkolelu Galilea trokiñ mapu mew, mülelu Jerusalen waria mew. Tüfachi wentru ka peñmalafi chem weda dungu ñi femün Jesu, fey mew ka wiñoltufi Pilato mu.

Pilato ayüy ñi neykümtuafiel ta Jesu. Welu Jesu tañi pu kayñe ayüyngün Pilato ñi neykümtuafiel kangelu presulechi wentru, Barabas pingelu ti weñefe, ka langümchefe. Fewla epe rangi antüy Pilato entufi wekun mu ta Jesu. Pilato feypifi tati pu che: ‘¡Adkintufimün! ¡Tamün rey!’ Welu tati pu wünelechi saserdote wirarkeyngün: ‘¡Famtripape! ¡Langümfinge!’ Fey mew Pilato lifrekünufi ta Barabas, ka yengey Jesu ñi langümngeal.

Nag antü vierne antü mu külafantükukünungey kiñe mamüll mu. Tripalelay ti adentun mu, welu elkünungey epu weda mongen-ngechi wentru epuñpüle Jesu mu tañi layal. Welu petu ñi lanon Jesu, kiñe weda mongen-ngechi wentru feypieyew: ‘Tukulpayaen ta iñche, konülmi tami reyno.’ Ka Jesu llowdungueyew: ‘Rüf dungu feypieyu mülepatuayu tati Küme Rumel Mülewe mew.’

¡Müna küme maneluwün tati! ¿felelay? ¿Kimimi am chem küme mülewe piley Jesu? ¿Chew mülekefuy ti küme mülewe Ngünechen dewmalu ellaka mu? May, tüfachi Mapu mew. Ka Jesu ngüneniele wenu mapu mu, wiño mongeltuafi tüfachi wentru ñi ayüwünkechi mongeleal ti we Küme Rumel Mülewe Mapu mu. ¿Feyngelay ñi rume kümen tüfa?