¡AKAN kamachasipkisa! Jesusaruw jiwayasipki. Mä lawaruw warkkatapxatayna. Amparampit kayumpit clavonakampi chʼakkatapxatayna. ¿Kunatsa ukham lurapxpachäna?

Kunattix mä qhawqhaniw uñisipxäna. ¿Khitinakas uñisipxän uk yattati? Maynïrix Supay Satanás ñanqha angelawa. Jupaw Adanampi Evampirux Jehová Diosar jan jaysaykänti. Juparakiw Jesusan uñisirinakapampix akham Jesusar lurayäna.

Janïr aka lawar chʼakkatkasaxa, Jesusarux wal tʼaqhisiyapxäna. ¿Getsemaní huertat apapkäna uk amttati? ¿Uka uñisirinakax khitinakänsa? Jïsa, judionakan yupaychäwip irpirinakänwa. Ukat kamachapxänsa uk uñjañäni.

Kunapachatï Jesusar judionakan yupaychäwip irpirinakax katuntapkäna ukhaxa, apostolanakapax tʼijtxapxänwa. Axsarañatwa Jesusarux sapapaki uñisirinakapampi jaytjawayapxäna. Ukampis Pedrompi Juanampix janiw jay sarapkänti. Qhipapwa arkapxäna Jesusarux kamachapxanis uk uñjañataki.

Sacerdotenakax chuyman Anasan utaparuw Jesusarux apapxäna, kunattix nayrax jilïr sacerdotïnwa. Ukampis uka jaqinakax janiw jay ukankapkänti. Caifasan utaparuw Jesusar apapxarakïna, kunattix Caifasaw jilïr sacerdotïnxa. Ukanxa judionakan yupaychäwip walja irpirinakaw ukankapxäna.

Jesusarux kunjamsa juchañchapxani uka tuqitwa Caifasan utapan parlakipapxäna. Jesús tuqit kʼarinak parlapxañapatakiw mä qhawqhan irptanipxäna. Ukat yupaychäw irpirinakax akham sapxänwa: ‘Jesusarux jiwayañäspawa’ sasa. Ukatxa Jesusaruw ajanut thuskatapxäna, nuwjapxäna.

Ukäñkamasti, Pedrox anqankaskänwa. Wal uka arumax thaytʼäna, ukatwa jaqinakax nin phichasipxäna. Ukan juntʼurasisipkäna ukhaxa, mä uywat tawaquw Pedror uñkatasax akham säna: ‘Aka jaqix Jesusamp chikarakikïnwa’ sasa.

‘¡Janiw nayax jupampi chikäkayätti!’ sänwa Pedroxa.

Jumax Jesusampi chikaskayätawa sasax kimsa kutiw sapxäna. Ukampis Pedrox janiw sänwa, kimsa kuti ukham sisxäna ukhawa Jesusax kutjtanisin uñtanïna. Pedrox wal chuymap ustʼayasïna ukham kʼarisitapatxa, ukat sarxasin wal jachäna.

Viernesax Inti jalsunxän ukhaxa, sacerdotenakax Sanedrinan jachʼa tantachasiñ utaparuw Jesusar apapxäna. Ukanwa amtapxän kamachapxanis ukxa. Ukat Judea tuqinkir markanak uñjiri Poncio Pilato gobernadoraruw irpkatapxarakïna.

Pilator akham sapxänwa: ‘Aka jaqix jan wali jaqiwa, jiwañapaw’ sasa. Pilatox Jesusar jisktʼasax akham sänwa uka jaqinakaruxa: ‘Nätakix janiw juchanjamäkiti’ sasa. Ukat Galilea tuqinkir markanak uñjiri Herodes Antipas gobernadoraruw Jesusar apxaruyäna, jupasti Jerusalenankänwa. Jupaxa, Jesusax janiw juchanïkiti sarakikïnwa, ukat Pilatoruw kuttʼayxäna.

Pilatox Jesusar khitxañ munäna. Ukampis uñisirinakapax Barrabás sat lunthatar khitxañapwa mayipxäna. Niya chikürüxänwa, ukhaw Pilatox Jesusarux irpsunïna, ukat akham sänwa: ‘¡Akax apnaqirimaxa! ¡Uñtanipxam!’ sasa. Ukampis aytat sacerdotenakaxa akham sasaw artʼapxäna: ‘¡Jiwayma! ¡Jiwayam!’ sasa. Ukhamasti Barrabás lunthataruw khitxapxäna, ukampis Jesusarux jiwayañatakiw apapxäna.

Viernes jaypʼthapiw mä lawaru warkkatxapxäna. Ukatxa, Jesusan chʼiqäxaparusa kupïxaparusa pä lunthatwa warkkatapxarakïna, ukampis janiw dibujon ukax uñjaskiti. Jesusax janïr jiwkän ukhaxa mä lunthatax akham sänwa: ‘Taqi markanak apnaqkäta ukhax nayat amtasitätawa’ sasa. Ukat Jesusax akham sänwa: ‘Jumax nayamp chikaw Kusipachankäta’ sasa.

¡Wali askiw uka arsüwipaxa!, ¿janichä? ¿Jesusax kuna kusipachatsa parlaskäna, uk yattati? ¿Qalltan Diosax lurkäna uka kusipachax kawkinkänsa? Jïsa, aka Uraqinkänwa. Ukat Jesusax alaxpachat apnaqanxani ukhaxa, aka Uraqinkir machaq Kusipachan jakañapatakiw jaktayani. ¿Wali askipunïniw ukax janichä?